سبا په هېواد کې د ګوزڼ واکسین کمپاین پیلېږي

کابل (پژواک، ۳۱ وری ۱۴۰۴): له پولیو سره د مبارزې د کمپاین دفتر وايي چې سبا په افغانستان کې د ګوزڼ (پولیو) واکسین کمپیاین پیلېږي.

له پولیو سره د مبارزې د کمپاین دفتر نن (یک‌شنبه) پر اېکس‌پاڼه د یوه پیغام په خپرولو ویلي چې د پولیو ناروغي درملنه نه‌ لري خو د واکسین له لارې یې مخنیوی کېدای شي.

یاد دفتر له کورنیو غوښتي چې خپل له پنځو کلونو کم‌عمره ماشومان واکسین کړي.

ورته مهال، د هېواد د عامې روغتیا وزارت ویاند ډاکټر شرافت زمان پژواک خبري اژانس ته دغه موضوع تایید کړه.

خو نوموړي په دې اړه ډېر جزئیات وړاندې نه ‌کړل.

دا په داسې حال کې ده چې د پولیو لومړنۍ مثبته پېښه د تېر کال د کب میاشتې په ۴مه د بادغیس د بالامرغاب ولسوالۍ په قروتو سیمه کې ثبت شوې وه.