<p style="text-align: justify;">فېروزکوه (پژواک، ۷ غویی ۱۴۰۴): غور کې ځايي مسوولین وايي چې دغه ولایت کې د اوبو رسونې د یوې شبکې کار پیل شوی او ګټې اخیستنې ته په سپارلو سره به یې اووه سوه کورنۍ د څښاک پاکو اوبو ته لاسرسی ومومي.</p>
<p style="text-align: justify;">د غور د اوبولګونې رییس ملا رحمتالله اماني په همدې مناسبت جوړ شوو مراسمو کې وویل، د یادې پروژې کار چې ۱۶ میلیونه افغانۍ لګښت یې درلود، نن (یکشنبه) د دغه ولایت د چهارسدې ولسوالۍ په «دهحاجي» کلي کې پيل شو.</p>
<p style="text-align: justify;">د هغه په خبره، د یادې پروژې په بشپړېدو سره به ۷۰۰ کورنیو ته د څښاک پاکې اوبه برابرې شي او په دې برخه کې به د خلکو شته ستونزې حل شي.</p>
<p style="text-align: justify;">نوموړی وايي، د یادې شبکې د جوړېدو لګښت د اوبو او انرژۍ وزارت له بودجې څخه ورکول کېږي.</p>
<p style="text-align: justify;">هغه زیاته کړه: «اوبه د ژوند مهمه اړتیا ده چې باید په قدر یې وپوهېږو او موږ هر یو باید د اوبو له ډېر مصرف څخه ډډه وکړو څو د خدای له دې نعمت څخه بېبرخې نهشو.»</p>
<p style="text-align: justify;">ورته مهال، د غور د چهارسدې ولسوالۍ یو شمېر اوسېدونکو د یادې پروژې له پیل هرکلی وکړ او هیله لري چې ژر بشپړه او ستونزې یې حل شي.</p>
