پاکستان د افغانستان ۱۵۰ باروړونکو موټرو ته د واګه بندر له لارې هند ته د ننوتلو اجازه ورکړه

کابل (پژواک، ۱۲ غويی ۱۴۰۴): د راپورونو له مخې، د پاکستان او هند د اړیکو تر ترینګلتیا وروسته، تېره ورځ پاکستان د افغانستان ۱۵۰ باروړونکو موټرو ته چې هند ته یې سوداګزیز توکي لېږدول، د واګه له بندره د تېرېدو اجازه ورکړې ده.

د پاکستانۍ ورځپاڼې ډان د راپور له مخې، د پاکستان بهرنیو چارو وزارت ویلي، دغه اقدام یې د پاکستان او هند د اړیکو د وروستۍ ترینګلتیا د کمېدو په موخه کړی دی.

په راپور کې راغلي، اسلام‌اباد کې د افغانستان سفارت چارواکو له پاکستانه غوښتي څو هغو باروړونکو موټرو ته چې د پاکستان له لارې هند ته ځي، له واګه بندره د تېرېدو اجازه ورکړي.

سرچینه زیاتوي، د پاکستان د بهرنيو چارو وزارت، اسلام‌اباد کې د افغانستان له سفارت څخه د یادو ۱۵۰ باروړونکو موټرو نوملړ ترلاسه کړی او وروسته یې له یاد بندره د تېرېدو اجازه ورکړې ده.

د پاکستان او هند اړيکې، د روانې (غویي) میاشتې په درېیمې نېټې د هند تر کنټرول لاندې د کشمیر په پهلګام کې پر سیلانیان تر وسله‌وال برید وروسته – چې په کې ۲۶ کسان ووژل شول او ۱۷ نور ټپیان شول – ترینګلې شوې.

هند دغه برید د پاکستان له لوري ملاتړ کېدونکو ډلو پورې اړوند وباله او اسلام‌اباد یې له تروریزم څخه پر ملاتړ تورن کړ؛ خو پاکستان دغه تورونه رد کړي دي.