غزني (پژواک، ۱۴ غبرګولی ۱۴۰۴): د غزني د مرکز او یو شمېر ولسوالیو له روغتیايي مرکزونو سره د ۳۰ میلیونه افغانیو په ارزښت د روغتیايي تجهیزاتو او یو شمېر وسایطو مرسته وشوه.
د غزني د عامې روغتیا ريیس ډاکټر محمدځیرک ځیرک وویل، یاده مرسته د عامې روغتیا وزارت په غوښتنه د یونیسف او روغتیا نړۍوال سازمان (WHO) په مالي ملاتړ او د «جک» موسسې په همکارۍ ترسره شوې ده.
هغه زیاته کړه: «د دې مرستې په لړ کې ۷ امبولانسونه، ۳۳ موټرسایکلونه، د الټرساونډ ۶ ماشینونه، د اکسیجن د تولید یو ماشین او نور طبي تجهیزات د غزني ولایتي روغتون، د روږدو لپاره ۵۰ بستریز روغتون او د اندړو، خوږیاڼو، اجرستان او قرهباغ ولسوالیو روغتونونو ته ورکړل شول.»
هغه زیاته کړه، له دې مرستې سره به د غزني ښار او لرو پرتو ولسوالیو د خلکو لپاره روغتیايي خدمتونه ښه شي او د ناروغانو د انتقال او تشخیص برخه کې به جدي ستونزې له منځه ولاړې شي.
د جک موسسې ولایتي مسوولې ډاکټر یاسمین نېکفر وویل، دا مرسته به د بېړنیو ناروغانو د ژغورنې او درملنې برخه کې مهمې اسانتیاوې رامنځته کړي.
هغې زیاته کړه: «موږ هڅه کوو چې په راتلونکي کې دغه ډول مرستې نورو سیمو ته هم پراخې کړو.»
د اجرستان ولسوالۍ روغتیايي مسوول ډاکټر همزه وویل، مخکې یې روغتیايي مرکزونه د وسایلو او وسایطو له جدي کمښت سره مخ وو.
د اجرستان یوه اوسېدونکي اکرام پژواک ته وویل، د وسایلو نشتوالي له امله به یې د ناروغانو تشخیص نه کېده او امبولانس هم نه و.
هغه غوښتنه وکړه چې دغه مرسته بسنه نه کوي، باید نورې مرستې هم وشي.
د یادونې ده، دا مهال په غزني ولایت کې ۱۸۰ دولتي روغتیايي مرکزونه فعال دي.
GET IN TOUCH
NEWSLETTER
SUGGEST A STORY
PAJHWOK MOBILE APP