تهران کې د افغانستان سفارت د کبرا رضايي د قتل قضیه تعقیبوي

کابل (پژواک، ۲۳ غبرګولی ۱۴۰۴): تهران کې د افغانستان سفارت د ایران له عدلي او قضايي بنسټونو غوښتي چې په دغه هېواد کې د مېشتې افغان کډوالې کبرا رضايي قاتل ژر تر ژره د قانون منګولو ته وسپاري.

د راپورونو له مخې، کبرا رضايي د خپل کارځای په لور روانه وه چې تښتول شوې او وروسته بیا په ډېره بې‌رحمۍ سره وژل شوې ده.

تهران کې د اسلامي امارت سفارت د یوې اعلامیې په خپرولو سره دا پېښه غندلې او د کبرا له کورنۍ سره یې خواخوږۍ څرګنده کړې ده.

سرچینه لیکي چې اړین اسناد، لکه وثیقه، حصر وراثت او وکالت‌لیک چمتو او د کبرا کورنۍ ته سپارل شوي دي.

په اعلامیه کې راغلي چې د دغه سفارت مسوولینو د ایران د کنسولي چارو له عمومي ادارې سره لیدنه کړې او په تړاو یې د سفارت رسمي یادښت هم یادې ادارې ته سپارلی دی.

د سفارت د معلوماتو له مخې، ایراني چارواکو ډاډ ورکړی چې مجرم به د هویت له په پام کې نیولو پرته، عدالت ته وسپارل شي.