<p style="text-align: justify;">کابل (پژواک، ۱۲ زمری ۱۴۰۴): ملګرو ملتونو له مرستهکوونکو غوښتي چې افغانستان ته له ایران او پاکستان څخه د ستنېدونکو ښځو او نجونو د ملاتړ لپاره بودجه ډېره کړي.</p>
<p style="text-align: justify;">په افغانستان کې د ملګرو ملتونو د ښځو برخې څانګې نن پر خپله اېکس<a href="https://x.com/unwomenafghan">پاڼه</a> له بسپنه ورکوونکو غوښتنه کړې چې افغانستان ته له ایران او پاکستان څخه ستنېدونکو ښځو او نجونو لپاره دې تمویل ډېر کړي.</p>
<p style="text-align: justify;">سرچینې ټینګار کړی چې د هغو ښځینه مرستندویانو باید ملاتړ وشي چې افغانستان ته له ستنېدونکو کډوالو سره مرسته کوي.</p>
<p style="text-align: justify;">ملګري ملتونه ویلي: «موږ له بسپنهورکوونکو غوښتنه کوو چې غوښتنې ته مو غوږ ونیسي او له موږ سره مرسته وکړي.»</p>
<p style="text-align: justify;">دا غوښتنه په داسې حال کې مطرح کېږي چې د ملګرو ملتونو د ماشومانو د ملاتړ صندوق (یونیسف) دوه ورځې مخکې په یوه راپور کې ویلي وو چې له ایرانه د افغان کډوالو پراخ راستنېدنه په پولو کې پر خدمتونو او امکاناتو فشار زیات کړی او د مالي منابعو کمښت د مرستندویو بنسټونو چارې له ستونزو سره مخ کړې دي.</p>
<p style="text-align: justify;">د یادونې ده، په دې وروستیو کې له ایران او پاکستان څخه د افغان کډوالو د جبري ایستلو لړۍ چټکه شوې چې د کډوالو او راستنیدونکو چارو وزارت د معلوماتو له مخې، یوازې په تېرو درېیو میاشتو کې له ایرانه نږدې ۱.۸ میلیونه افغان کډوال راایستل شوي دي.</p>
<p style="text-align: justify;"></p>
<p style="text-align: justify;"></p>
