<p style="text-align: justify;">کابل (پژواک، ۲۸ زمری ۱۴۰۴): د افغانستان کرکټ بورډ وایي چې د ملي لوبډلې لوبغاړي په کابل کې د لس ورځني تمریني کمپ له بشپړولو وروسته د افغانستان، اماراتو او پاکستان ترمنځ په راتلونکې لوبلړۍ کې د ګډون لپاره نن متحده عربي اماراتو ته ولاړل.</p>
<p style="text-align: justify;">د افغانستان د کرکټ بورډ ویاند سیدنسیم سادات نن پر خپله فیسبوکپاڼه لیکلي چې د افغانستان، اماراتو او پاکستان ترمنځ د راتلونکې درې اړخیزه لوبلړۍ لپاره د ملي لوبډلې د ابتدایي نوملړ لوبغاړي په کابل کې د لس ورځني تمریناتي کمپ له بشپړولو وروسته نن ماسپښین د متحده عرب اماراتو په لور روان شول.</p>
<p style="text-align: justify;">هغه زیاته کړې، یاد لوبغاړي به په متحده عرب اماراتو کې په دویم تمریناتي کمپ کې ګډون وکړي چې په پای کې به یې د لوبلړۍ لپاره نهایي نوملړ اعلان شي.</p>
<p style="text-align: justify;">د یادونې وړ ده، چې د افغانستان، اماراتو او پاکستان ترمنځ لوبلړۍ به د اګست میاشتې په ۲۹مه نېټه د په شارجه کرکټ لوبغالي کې پیل شي او د سپټمبر تر اوومې به دوام وکړي.</p>
<p style="text-align: justify;">له دې سیالیو وروسته به افغان کرکټ ملي لوبډله د اسیا جام په سیالیو کې چې د روان میلادي کال د سپټمبر په نهمه به د متحده عربي اماراتو په کوربتوب پیل شي، هم ګډون وکړي.</p>
