<p style="text-align: justify;">پاراخ (پژواک، ۲۶ وږی ۱۴۰۴): د پنجشېر ځایي چارواکو اعلان کړی چې د دغه ولایت د پریان او درې ولسوالیو خلکو ته د اوبولګولو کانالونو، کانکرېټي او خامو سړکونو، د محافظتي دېوالونو او پلیو لارو په ګډون ۴۰ پروژې ګټې اخیستنې ته وسپارل شوې.</p>
<p style="text-align: justify;">د پنجشېر د والي ویاند سیفالدین لټون پژواک خبري اژانس ته وویل چې دا پروژې د نړۍوال بانک په مالي ملاتړ د «اکتید» موسسې له لوري د ۶۱ میلیون او ۸۳۸ زره افغانیو په لګښت پلې شوې دي.</p>
<p style="text-align: justify;">د هغه په وینا، ۲۳ پروژې په پریان ولسوالۍ کې او ۱۷ نورې په درې ولسوالۍ کې ګټې اخیستنې ته سپارل شوې دي.</p>
<p style="text-align: justify;">نوموړي زیاته کړه چې په دغو پروژو کې ګڼو خلکو ته د کار زمینه برابره شوې وه او د څه باندې ۱۸ زرو کورنیو ستونزې یې هوارې کړې دي.</p>
<p style="text-align: justify;">د درې ولسوالۍ د عبداللهخېل کلي یوه اوسېدونکي مددخان پژواک ته وویل: «زموږ لارې ورغول شوې، د خلکو ستونزې حل شوې، مخکې له جوړېدو په ژمي کې له ډېرو ستونزو سره مخ وو، اوس مو ستونزې حل شوې دي.»</p>
<p style="text-align: justify;">د ځایي سرچینو د معلوماتو له مخې، دا مهال په پنجشېر کې ۲۰۰ نورې پروژې هم روانې دي څو د خلکو لپاره لا ډېرې اسانتیاوې رامنځته کړي.</p>
