غزني کې د رزمي ورزشونو «هوشارافو» سبک سیالۍ پای ته ورسېدې

<p style="text-align: justify;">غزني ښار (پژواک، ۱ تله ۱۴۰۴): د غزني د بدني روزنې او ورزش امریت مسوولین وایي چې په دغه ولایت کې د څلورو ولایتونو د ۱۲۰ ورزشکارانو ترمنځ د رزمي ورزشونو «هوشارافو» سبک دوه ورځنۍ سیالۍ پای ته ورسېدې.</p>

<p style="text-align: justify;">د غزني ولایت د بدني روزنې او ورزش امر حاجي بلال مجاهد پژواک خبري اژانس ته وویل، دا سیالۍ تېره ورځ د رزمي ورزشونو د فدراسیون له لوري د څلورو ولایتونو د هوشارافو سبک د ۱۲۰ ورزشکارانو ترمنځ پیل شوې وې.</p>

<p style="text-align: justify;">نوموړي زیاته کړه، په دې سیالیو کې د غزني، کابل، هرات او زابل ولایتونو ورزشکارانو ګډون کړی و چې د «تک فایټ» په سیستم ترسره شوې.</p>

<p style="text-align: justify;">د ده په وینا، په دغو سیالیو کې غزني لومړی، هرات دویم، کابل درېیم او زابل څلورم مقام خپل کړی دی.</p>

<p style="text-align: justify;">هغه وویل، دا سیالۍ په درېیو عمري کټه‌ګوریو (نوي ځوانان، ځوانان او لویان) کې ترسره شوې.</p>

<p style="text-align: justify;">مجاهد څرګنده کړه، د دغو سیالیو ترسره کولو موخه د ورزشکارانو هڅونه، د غوره استعدادونو پېژندنه او د ورزشکارانو ترمنځ یووالی او همغږي رامنځته کول وو.</p>

<p style="text-align: justify;">په ورته مهال، هغه ورزشکاران چې په دې سیالیو کې یې برخه اخیستې وه، خوښي څرګندوي او له حکومته غواړي چې د دې ډول لا ډېرو سیالیو د ترسره کېدو زمینه ورته برابره کړي.</p>