<p style="text-align: justify;">هرات (پژواک، د تلې لومړس نېټه ۱۴۰۴): د هرات په صنعتي ښارګوټي کې د څه باندې ۶۲ میلیون امریکايي ډالرو په پانګونه ۱۰ نوې تولیدي کارخونې جوړې او پرانیستل شوې چې د درملو، خوراکي توکو، لبنیاتو، فرش او اوړو په دغو تولیدي کارخونو کې سلګونو کسانو ته په مستقیم او غیرمستقیم ډول د کار زمینه برابره شوې ده.</p>
<p style="text-align: justify;">د «اروین فارمان» شرکت عمومي مدیر عبدالله دیان له پژواک اژانس سره خبرو کې وویل چې د درمل جوړولو برخه کې یې شاوخوا ۸ میلیون امریکايي ډالر پانګونه کړې ده.</p>
<p style="text-align: justify;">د هغه په خبره، اوس مهال ۷۸ قلمه درمل لري او په نږدې راتلونکي کې به دغه انداره ۱۵۰ قلمو ته لوړه کړي.</p>
<p style="text-align: justify;">هغه زیاته کړه چې په دې کارخونه کې۸۰ کسانو ته په مستقیم او ۱۰۰۰ کسانو ته په غیرمستقیم ډول د کار زمینه برابره شوې او په ۲۸ ولایتونو کې نمایندهګۍ لري.</p>
<p style="text-align: justify;">نوموړي د ځمکې کمښت د خپل کاروبار پر وړاندې یوه جدي ستونزه یاده کړه او له حکومته یې وغوښتل څو د صنعتکاراتو د اړتیاوو پوره کولو لپاره دوی ته نورې ځمکې هم ووېشي.</p>
<p style="text-align: justify;">بلخوا، د «هرات باختر» د فرش تولیدي شرکت مدیر نبيالله عظیمي پر دغه شرکت پنځه میلیون ډالر پانګونې ته په اشاره وویل چې ۵۰ کسانو ته یې په مستقیم ډول د کار زمینه برابره کړې او په خبره یې، په یوه شپه او ورځ کې یه ۳۵۰۰ تر ۴۰۰۰ متره موکت فرش تولیدوي چې د میاشتني تولید کچه یې ۱۰۰ زره مترو ته رسیږي.</p>
<p style="text-align: justify;">عظیمي تینګار وکړ چې پانګهوال باید د صنعت په بېلابېلو برخو کې پانګونې وکړي او یوازې تر بوې برخې محدود نه شي.</p>
<p style="text-align: justify;">د اقتصادي چارو کارپوهان هم د یادو نوو کارخونو پرانیستل د افغانستان د ځان بسیاینې لپاره یو مثبت ګام بولي او وايي چې دغه چاره د کاري فرصتونو برابرېدو، د بېکارۍ کچې ټیټېدو، د داخلي تولیداتو ډېرېدو، له وارداتو د مخنیوي او هېواد ته د ټکنالوجۍ د رالېږد لامل کېږي.</p>
<p style="text-align: justify;">یوه کارپوه ګلاب حیدري د دغه مطلب په بیانولو وویل چې د فابریکو پرانیستل کېدل، لومړی د بېکارۍ کچه ټیټوي او وروسته ملي عواید زیاتوي.</p>
<p style="text-align: justify;">په همدې حال کې، د هرات د صنعت او کانونو خونې رییس محمدناصر امین هم د ځمکې کمښت د صنعتکاراتو له اساسي ستونزو وباله او ټینګار یې وکړ چې د صنعتي ځمکې برابرول د تولیداتو د پراختیا لپاره یوه بیړنۍ اړتیا ده.</p>
<p style="text-align: justify;">د هغه په خبره، یادې ۱۰ فابریکې د درملو، خوراکي توکو، لبنیاتو، فرش، اوړو او نورو محصولاتو د تولید برخه کې په فعالیت پیل کړی او څه باندې ۶۲ میلیون امریکايي ډالر پانګونه پرې شوې ده.</p>
<p style="text-align: justify;">ورته مهال، د هرات والي مولانا نوراحمد اسلامجار د دغو فابریکو له پرانیستې د هرکلي ترڅنګ وویل چې ځايي اداره هڅه کوي څو په دغه ولایت کې د سوداګرو او پانګونو د ملاتړ په برخه کې لار ډېرې اسانتیاوې برابرې کړي.</p>
<p style="text-align: justify;">د مسوولینو د معلوماتو له مخې، په دې وروستیو کلونو کې د هرات په صنعتي ښارګوټي کې د فابریکو جوړولو په شمېر کې زیاتوالی راغلی او دمګرۍ په دغه ښارګوټي کې نږدې ۱۲۰۰ کارخونې د بېلابېلو توکو د تولید برخه کې فعالیت کوي.</p>
