د افغانستان د فوټسال ملي لوبډله نن له ویټنام سره لوبه کوي

<p style="text-align: justify;">کابل (پژواک، ۲۸ مرغومی ۱۴۰۴): د افغانستان د فوټسال ملي لوبډله نن په یوه دوستانه سیالۍ کې د ویټنام د لوبډلې پر وړاندې لوبېږي.</p>

<p style="text-align: justify;">دا لوبه نن (یک‌شنبه) ماسپښین ۲:۳۰ بجې د ویټنام په کوربه‌توب ترسره کېږي.</p>

<p style="text-align: justify;">ټاکل شوې چې د هېواد د فوټسال ملي لوبغاړي د ویټنام د فوټسال ملي لوبډلې پر وړاندې دوه تمریني دوستانه سیالۍ ترسره کړي.</p>

<p style="text-align: justify;">دغه تدارکاتي لوبې د اسیا ملتونو جام سیالیو کې د پیاوړي ګډون لپاره د لا ډېر چمتووالي په موخه ترسره کېږي.</p>

<p style="text-align: justify;">د افغانستان د فوټبال فدراسیون وایي چې د دواړو لوبډلو دویمه دوستانه لوبه به هم د روان کال د جنورۍ په ۲۰مه، د مازدیګر په ۵:۰۰ بجې ترسره شي.</p>

<p style="text-align: justify;">دغه فدراسیون روښانه کړې چې د افغانستان د فوټسال ملي لوبډلې د ویټنام پر وړاندې دوستانه لوبې به د تړلو دروازو تر شا او په ژوندۍ بڼه د ټلوېزیون په پرده له راوړلو پرته ترسره شي.</p>

<p style="text-align: justify;">د یادونې ده، د افغانستان د فوټسال ملي لوبډله به د تمریني کمپ او د ویټنام پر وړاندې دوستانه لوبو تر پای وروسته، دغه هېواد پرېږدي او ټایلېنډ ته به ولاړه شي څو د هغه هېواد د فوټسال ملي لوبډلې پر وړاندې نورې تدارکاتي لوبې ترسره کړي.</p>