<p style="text-align: justify;">کابل (پژواک، ۲۳ وری ۱۴۰۵): د راپورونو له مخې، د امریکا استخباراتي سرچینو ادعا کړې چې چین ایران ته د نوو هوايي دفاعي سیسټمونو لېږل ارزوي؛ ډونالډ ټرمپ ويلي چې که چین داسې کار وکړي، له «جدي پایلو» سره به مخ شي او بیجینګ بیا دا موضوع رد کړې ده.</p>
<p style="text-align: justify;">سياېناېن پرون (شنبه) د هغو درېیو کسانو چې د امریکا له وروستیو استخباراتي ارزونو سره بلد دي، له قوله راپور ورکړی چې چین په راتلونکو څو اونیو کې ایران ته د نوو هوايي دفاعي سیسټمونو د سپارلو لپاره چمتووالی نیسي.</p>
<p style="text-align: justify;">له دغو سرچینو دوو یې سياېناېن ته ویلي، داسې نښې شته چې بیجینګ هڅه کوي دا سیسټمونه د درېیمو هېوادونو له لارې ولېږدوي، څو د هغوی اصلي سرچینه پټه وساتي.</p>
<p style="text-align: justify;">سرچینو زیاته کړې، هغه سیسټمونه چې چین یې لېږلو ته چمتووالی نیسي، د هوايي دفاع توغندیو (له اوږې ویشتل کېدونکی) سیسټمونه دي چې د MANPAD په نوم پېژندل کېږي.</p>
<p style="text-align: justify;">په همدې حال کې، د امریکا ولسمشر ډونالډ ټرمپ خبریالانو ته ویلي چې که بیجینګ تهران ته وسلې واستوي، له «پایلو» سره به مخ شي.</p>
<p style="text-align: justify;">هغه فلوریډا ته د تګ پر مهال له سپینې ماڼۍ د وتلو پر مهال ویلي: «که چین دا کار وکړي، له لویو ستونزو سره به مخ شي، سمه ده؟»</p>
<p style="text-align: justify;">هغه په دې اړه نور جزئیات نه دي ورکړي.</p>
<p style="text-align: justify;">له بلې خوا، راپور وايي چې په واشنګټن کې د چین د سفارت ویاند دا ادعا رد کړې ده.</p>
<p style="text-align: justify;">هغه ویلي: «چین هيڅکله د جګړې هیڅ لوري ته وسلې نه دي ورکړې. دا معلومات ناسم دي.»</p>
<p style="text-align: justify;">هغه زیاته کړې چې چین د یوه مسوول هېواد په توګه تل پر خپلو نړۍوالو ژمنو ولاړ دی.</p>
<p style="text-align: justify;">هغه ټینګار کړی: «موږ له امریکايي لوري غواړو چې له بېاساسه ادعاوو، بد نیتو اړیکو جوړولو او جنجال رامنځته کولو ډډه وکړي، هیله ده چې اړوند لوري د تاوتریخوالي کمولو لپاره لا زیات اقدامات وکړي.»</p>
<p style="text-align: justify;">دا په داسې حال کې ده چې د امریکا د ولسمشر مرستیال جيډي ونس له ایران سره له ۲۱ ساعته خبرو وروسته، بې له کومې هوکړې پاکستان پرېیښی او ایران هم ویلي چې دواړو لورو د «امریکا د زیاتو غوښتنو او جاهطلبیو» له امله تر اوسه کومې هوکړې ته نه دي رسېدلي.</p>
