ترينکوټ ( پژواک د کب لومړۍ نېته ٩٠ ) : د اروزګان په مرکز ترينکوټ ښار کې د يوه شپيته کلن سپين ږيري په ګډون دوه تنه تر هغه ديوال لاندې مړه شول ، چې د زيات اورښت له امله ونړېد.
د دې ولايت د والي وياند سيد معروف همدرد د کب په لومړۍ نېټه، پژواک خبري اژانس ته وويل چې دا پېښه نن له غرمې مخکې په لسو بجو د ترينکوټ ښار د تودې په سيمه کې رامنځته شوه.
دى وايي چې په ياده سيمه کې دوه ځايي اوسېدونکي ، چې عمرونه يې د ٥٠ او ٦٠ کلونو ترمنځ وو، په يوه کوڅه کې روان و، چې ناڅاپه دېوال پرې را پرېوت او دواړه ترې لاندې مړه شول.
هغه زياته کړه چې له تېرو پنځو ورځو راهيسې د واورې او باران د اورښتونو له امله يو شمېرخامه کورونه زيانمن شوي دي.
د والي وياند وويل چې مړي لومړى روغتون ته يوړل شول او بيا خپلو کورنيو ته وسپارل شول.
د يادونې ده ، چې په دې وروستيو کې د هېواد په بېلابېلو سيمو کې د واورو او بارانونو د زيات اورښت او سړې هوا له امله له سلو زيات هېواد وال مړه شوي دي.
