تالقان (پژواک ١٠ کب ٩٠): په تخار ولايت کې د يوې ترافيکي پېښې له امله درې تنه مړه او يو بل ټپي شو.
د تخار د امنيه قوماندانۍ د ترافيکو مدير سمونیارغلام فاروق نن (د کب لسمه) پژواک خبري اژانس ته وويل، کرولا موټر، چې تېره شپه له تخار څخه کندوز پر لاره و، د تالقانو ښار د سوي موټر په سيمه کې د سړک ترڅنګ له يوه ولاړ باروړونکي موټر سره ټکر وکړ.
هغه زياته کړه، چې په دې پېښه کې د کرولا درې سپرلي مړه شوي او يو بل ټپي شوى دى.
د تخار د ولايتي روغتون د اداري چارو مسؤول عبدالقيوم دغه روغتون ته د يوه ټپي د ور وړلو موضوع تاييد کړه او پژواک ته يې وويل، چې د ټپي روغتيايي حالت د اندېښنې وړ دى او د کندوز ولايت روغتون ته وړل شوى دى.
د يادونې ده، د تېرې مياشتې په اتمه نېټه هم د تالقانو ښار د قلبر په سيمه کې د يوې ترافيکي پېښې له امله دوه تنه مړه او اته نور ټپيان شوي وو.
