کابل (پژواک ٧ غويى ٩٢): تېره اونۍ د هېواد په بېلابېلو سيمو کې د طبيعي او ترافيکي پېښو له امله شاوخوا ٢٧٨ افغانانو ته مرګ ژوبله اوښتې ده.
دغه مرګ ژوبلې د تېرې اونۍ په اوږدو کې د هېواد په بېلابېلو سيمو کې د زلزلې، سېلابونو، بارانونو، تندر پرېوتو او ترافيکي پېښو له امله رامنځته شوې دي.
د تېرې اونۍ تر ټولو خونړۍ پېښه د افغانستان په ختيځ کې شوې زلزله وه، چې له امله يې ١٧ تنه مړه او شاوخوا ١٤٠ تنه نور ژوبل شول.
د ننګرهار د والي وياند احمدضياء عبدالزي پژواک اژانس ته د يادې مرګ ژوبلې د تاييد ترڅنګ وويل، چې ولايتي اداره له ځپل شوو کورنيو سره د مرستو لړۍ پيل کړې ده.
دغه راز په شمالي ولايت بلخ کې د سېلابونو له امله ٢٠ تنه مړه او سلګونه کورونه ويجاړ شول.
په سوېلي ولايت کندهار کې د يوې خونړۍ ترافيکي پېښې له امله ٤٥ تنه مړه او تر ١٠ نور ژوبل شول.
په همدې توګه په ننګرهار، پروان او غزني ولايتونو کې هم د ترافيکي پېښو له امله شاوخوا لس تنه مړه او ١٢ نور ټپيان شوي دي.
د تېرې اونۍ پر مهال په پروان ولايت کې د تندر پرېوتو له امله يو تن مړ او ١١ نور ژوبل شوي دي.
دغه راز سېلابونو په پروان او بغلان ولايتونو کې هم خلکو ته مرګ ژوبله اړولې ده.
