منځپانګې ته تلل
دوشنبه ۱۶ نومبر ۲۰۲۶ · کابل ۱۲:۲۰ غ.و
۱۳° — په ټولو ولایتونو کې هوا
صاف · ↑۱۴° ↓۰°
د هوا کیفیت: منځنی

د ١٩ کلنو ملي لوبډله ماليزيا ته روانه شوه

· ۳ دقیقې لوستل · ۷۸ کتنې

کابل (پژواک ٧ غويى ٩٢): د افغانستان د ١٩ کلنو ملي لوبډله په ماليزيا کې د اسيا د ١٩ کلنو لوبډلو د ايليټ کپ سياليو کې د ګډون په موخه دغه هېواد ته روانه شوه.

ماليزيا ته تر روانېدو مخکې د غويي په ٧مه د ١٩ کلنو ملي لوبډلې نوى کپتان ناصر جمال احمدزي د کابل په نړيوال لوبغالي کې پژواک خبري اژانس ته وويل، چې دوى د راتلونکو سياليو لپاره بشپړ تياريانې نيولې دي.

هغه زياته کړه، چې له تېرو نږدې يوې نيمې مياشتې راهيسې د پاکستان په لاهور او پېښور ښارونو کې تمرينات او له ځايي لوبډلو سره تمريناتي لوبې کړې او پايله به يې د ماليزيا په سياليو کې معلومه شي.

نوموړي د افغانستان د کرکټ بورډ له  ادارې څخه مننه وکړه، چې د دوى لپاره يې د تمريناتو او روزنې ښې اسانتياوې برابرې کړې وې.

د ١٩ کلنو لوبډلې روزونکى دولت خان احمدزى وايي، چې دوى په تېرو ٤٠ ورځو کې په پاکستان کې د تمريناتو پر مهال لوبغاړو ته د کرکټ په هره برخه کې روزنه ورکړې ده.

د هغه په  وينا، دوى هره ورځ په  درېيو برخو کې لوبغاړو ته د کرکټ د تخنيکونو او تکتيکونو ترڅنګ هغوى ته ذهني او جسماني روزنه هم ورکړې ده.

ده زياته کړه: ((له لوبغاړو سره مو ډېره خواري کړې او هيله من يو چې په ماليزيا کې ښې لاسته راوړنې ولرو.))

د افغانستان د کرکټ بورډ وياند فريد هوتک وايي، د ماليزيا په سياليو کې لس لوبډلې ګډون کوي چې په دوو ګروپونو کې وېشل شوي دي.

د ده په وينا، په الف ګروپ  کې  افغانستان، هانګ کانګ، امارات ، تايلينډ او سعودي عربستان او په ب ګروپ  کې  نيپال، قطر، بحرين ، ماليزيا او کويټ لوبډلې شاملې دي.

هوتک وايي، چې د دغو لوبو د مهال وېش له مخې د  مى په دويمه نېټه (د غويي ١٢مه) به د کرکټ د مسوولينو، کپتانانو او د لوبډلو د منېجرانو ترمنځ غونډه جوړېږي او لوبډلې به خپل تمرينات ترسره کېږي.

نوموړى زياتوي، چې دا سيالۍ د مې په درېيمه پيلېږي، افغانستان به خپله لومړۍ لوبه په همدې ورځ له سعودي عربستان سره، د مى په څلورمه له متحده عربي اماراتو سره، د مې په شپږمه له تايلينډ سره او د مې په اوومه له هانګ کانګ سره خپله وروستۍ لوبه کوي.

 د مې په لسمه به د دغو سياليو سيمي فاينل يا نيمه پاى پاى لوبې او په يوولسمه نېټه  به پاى لوبه ترسره شې، د مىېپه ١٢مه، به لوبډلې بېرته د خپلو هېوادونو په لوري وخوځېږي.

دا لوبې د ماليزيا پر وخت د سهار په نهه نيمو بجو چې د افغانستان د سهار له شپږو بجو سره سمون خوري پيلېږي.

د دغو سياليو ګټونکې لوبډله به د ٢٠١٤ کال د ١٩کلنو لوبډلو په نړيوال جام کې، چې په اماراتو کې ترسره کېږي، ګډون کوي. امارات د کوربه هېواد په توګه لا د مخه د ١٩ کلنو  نړيوال جام ته لاره پيدا کړې ده.

د ١٩ کلنو په ملي لوبډله کې لاندې لوبغاړي شامل دي.

ناصر جمال احمدزی (کپتان)، حشمت الله شهيدي (مرستيال کپتان) شرف الدين اشرف ، سيد شېرزاد، يونس احمدزی، عبدالرحيم منګل، شاهدالله ، جاوېد خان، ضاءالرحمن اکبر، مسلم موسی ، سيد وحيدالله شفق، ظاهر، منير احمد  او خيبر عمر.