کابل (پژواک ٢٥ غويى ٩٢): د کابل د څرخي پله زندان ته څېرمه د زندان په يوه نوې جوړېدونکې ودانۍ کې لګېدلى اور کنټرول شوى او ځاني زيان نه لري.
د زندانونو عمومى رييس لوى پاسوال اميرمحمد جمشيدي پژواک خبري اژانس ته وويل، چې دغه اور نن شاوخوا دوې بجې د برېښنا د شارټۍ له امله ولګېد.
دى وايي، هغه ودانۍ چې اور په کې لګېدلى، د ملي دفاع وزارت د زندان لپاره د يو امريکايي ودانيز شرکت له خوا جوړيږي او د برېښنا ياده شارتي د دغه شرکت د کارکوونکو د بې احتياطۍ له امله رامنځته شوې وه.
د ده د معلوماتو له مخې، دغه نوې جوړېدونکې ودانې د څرخي پله زندان د ودانۍ په شاوخو سل مترۍ کې موقعيت لري.
د هغه په وينا، په دې ودانۍ کې د اور لګېدنې له امله ځيني ودانيز توکي لکه لرګې، سمنټ او داسې نور سوځېدلي خو ځاني زيان نه لري.
د کابل د اطفايې مدير محمدکاظم وايي، چې اوس (له غرمې وروسته درې بجې او شل دقيقې) لګېدلى اور د مړ کولو په حال کې دى.
دى هم وايي، چې دغه اورلګېدنه د ولډينګ پر مهال د برېښنا د شارتۍ له امله رامنځته شوې او ځيني ودانيز توکي يې سوځولي دي .
دا په داسې حال کې ده، چې شاوخوا يو ساعت مخکې دوو امنيتي سرچينو پژواک ته ويلي وو چې په ياد زندان کې د تېلو يو ټانکر اور اخيستى او مالي زيان يې اړولى دى.
