دا راپور واورئ
۰:۰۰ / ۱:۰۰
پل علم (پژواک ٢٢ غبرګولى ٩٢): د لوګر په خوښۍ ولسوالۍ کې راوتلو سېلابونو خلکو ته مالي او ځاني زيان اړولى دى.
د لوګر د والي وياند دين محمد دروېش پژواک خبري اژانس ته وويل، چې نن مازيګر شاوخوا پنځه بجې په خوښۍ ولسوالۍ کې د بارانونو له امله سېلاب راوتلى، چې له امله يې دوه کوچۍ مېرمنې نادرکه شوې دي.
ده زياته کړه، د دې ولسوالۍ د کوچيانو شاوخوا تر ٢٠٠ ډېر څاروي او د خلکو اته واړه موټر هم اوبو له ځان سره وړي دي. دغه راز په لسګونه جريبه ځمکه ولاړ شنه فصلونه هم سېلابونو زيانمن کړي دي.
د خوښۍ د سيمه ييزې شورا مشر حاجي قسيم يادې شوې شمېرې تاييد کړې او زياته يې کړه، چې دا سېلاب له بر دوبندي سيمې څخه راوتلى دى.
د هغه په وينا، دمګړۍ (د مازيګر شاوخوا پنځه نيمې بجې) د سېلاب اوبه مخ په ډېرېدو دي.
