کابل( پژواک ٣٠ چنګاښ ٩٢) :دکابل نړيوال هوايي ډګر په چهل متره سړک درې محصلين دپوليس د رينجر موټر په ټکر کې مړه شول .
دکابل امنيه قوماندانۍ مرستيال مل پاسوال محمد داوود امين پژواک خبري اژانس ته وويل، چې دغه رينجر موټر تېر ماښام اوه بجې دهوايي ډګر پر لور روان و ، چې دسړک غاړې له ګلدان سره يې ټکر وکړ .
هغه د موټر چلوونکي تېز تګ دپېښې اصلي علت وباله او زياته يې کړه ،چې وژل شوي محصلين دننګرهار پوهنتون وو ، چې دګلدان په منځ کې ناست وو .
سرچينې زياته کړه، چې په دې پېښه کې څوک ټپيان شوي نه دي ، موټر چلوونکى نيول شوى او پوښتنې ترې روانې دي .
د ويلو ده ، چې خلک ځينې پوليس په کابل او نورو ولايتونو کې د موټرو په ګړندۍ ځغلونه او بې احتياطۍ تورنوي او وايي، چې دا ډول کړنې د ترافيکې پېښو او ملکي مرګ ژوبلې سبب ګرځي، چې بايد مخه يې ونيول شي .
تېر کال دکب مياشت کې هم دفارياب په ميمنې ښار کې يو پنځه کلن ماشوم او يوه ښځه د پوليسو د رينجر موټر د ټکر له امله مړه شول .
