کابل (پژواک، ٢٢ زمرى ٩٢): ولسمشر حامد کرزي د ميدان وردګو او پکتيکا له سېلاب ځپليو سره د بيړنې مرستې رسولو لارښوونه کړې ده.
د راپورونو له مخې، په يادو ولايتونو کې تېره او وړمه ورځ د راوتلو سېلابونو له امله پر مالي زيانونو سربېره، ٩ تنه مړه شوي او ١٣ نور ټپيان دي.
له ارګ څخه پژواک خبري اژانس ته په رالېږل شوې خبرپاڼه کې راغلي، چې حامد کرزي په ميدان وردګو او پکتيکا کې د وروستيو سېلاوونو له امله پر رامنځته شويو ځاني تلفاتو او مالي زيانونو خواشيني شوى دى.
په خبرپاڼه کې زياته شوې، ولسمشر له پېښو سره د مبارزې ادارې او د نورو اړوندو ادارو چارواکو ته لارښوونه کړې، چې زيان رسېدونکو ته ژر تر ژره بيړنۍ مرستې ورسوي.
خبرپاڼه کاږي، چې حامد کرزی د دغو طبيعي پېښو د قربانيانو کورنيو ته د خپلې ژورې خواخوږۍ او ډاډګېرنې مراتب وړاندې کوي او د لوی خدای له درباره هغوی ته د جميل صبر هيله لري.
