پل علم ( پژواک ١٩ وږى ٩٢) :د لوګر په خوشي ولسوالۍ کې د ملي اردو پر امنيتي پوسته ځانمرګي بريد څلور سرتېري ټپيان کړل.
د خوشي ولسوالۍ امنيه قوماندان سمونوال احمد نبي احمدزي د وږي په ١٩مه پژواک ته وويل، چې دغه ځانمرګى بريد نن شاوخوا يولس نيمي بجې د يوه سرف موټر په وسيله د شينکۍ په سيمه کې ترسره شو.
هغه زياته کړه، وسله والو لومړى پر امنيتي پوسته ډزې پيل کړې او وروسته يې د پوستې دروازې ته څېرمه له چاودېدونکو توکو ډک موټر ته چاودنه ورکړه.
احمدزى وايي، چاودنه زوروره وه ، پوسته يو څه زيانمنه شوې، د ملي اردو يواځې څلور سرتېري ټپيان شوي او د سيمې خلکو ته کوم زيان نه دى اوښتى.
وسله والو طالبانو ددغه بريد مسووليت پر غاړه واخيست .
طالب وياندذبيح الله مجاهد ادعاکوي ،چې په دغه بريد کې يې ٣٠ افغان عسکرو ته مرګ ژوبله اړولې ده.
خوشي د لوګر تر ټولو امن ولسوالۍ ده، چې د لوګر د مرکز پل علم ختيځ ته په شل کيلومترۍ کې پرته ده.
