دا راپور واورئ
۰:۰۰ / ۱:۰۰
ترينکوټ (پژواک ٢٥ سلواغه ٩٢): چارواکي وايي، وسله والو طالبانو د اروزګان په دهراوود ولسوالۍ کې پر يوې امنيتي پوستې بريد کړى، چې يو پوليس او د هغه دوه مېلمانه يې وژلي دي.
د دهراوود ولسوال امين الله خالقي د سلواغې په ٢٥مه پژواک خبري اژانس ته وويل، چې ياد بريد تېره نيمه شپه په ديزک سيمه کې پر يوې امنيتي پوستې شوى، چې يو پوليس او د هغه دوه مېلمانه په کې وژل شوي دي.
هغه زياته کړه، چې په ياده پوسته کې نور پوليس هم خو د بريد پر مهال سيمې ته پر ګزمه وتلي وو.
وسله والو طالبانو د دغه بريد مسووليت پر غاړه اخيستى دى.
قاري يوسف احمدي وايي، چې د دوى يوه نفوذي کس د اروزګان د دهراوود په ديزک سيمه کې د يوې امنيتې پوستې درې پوليس وژلي دي.
هغه زياته کړه، چې د وژل شوو پوليسو پنځه ميله وسلې هم د دوى لاس ته ورغلې دي.
