کابل (پژواک ٢٦ کب ٩٢): په ميدان وردګو کې د دوو ترافيکي پېښو له امله لسو تنو ته مرګ ژوبله اوښتې ده.
د دغه ولايت د والي وياند عطاالله خوګياڼي د کب په ٢٦مه پژواک خبري اژانس ته وويل، چې يوه پېښه نن د مرکز اړوند د کابل-کندهار پر لويه لار د تورو تيږو په سيمه کې د ٣٠٣ موټر د چپه کېدو له امله رامنځته شوه.
هغه وايي، چې په دغه پېښـه کې يو ماشوم مړ شوى، د دوو ماشومانو او يوې مېرمنې په ګډون ٨ تنه ټپيان شوي دي.
نوموړى وايي، ټپيان د دغه ولايت روغتون ته وړل شوي او روغتيايي حالت يې د ډاډ وړ دى.
د والي د وياند په خبره، چې دغه پېښه د چلوونکي د بې احتياطۍ له امله رامنځته شوې ده.
هغه زياته کړه، چې د ٣٠٣ دغه چلوونکى پوليسو نيولى او پوښتنې ترې روانې دي.
په ورته مهال نوموړي ويل، چې نن په دغه ولايت کې د يوه ٣٠٣ او فلاينکوچ تر منځ د ټکر له امله يو تن ټپي شوى دى.
هغه وايي، چې ټپي کس د فلاينکوچ چلوونکى دى.
په دې وروستيو کې د کندهار – کابل پر لويه لاره ترافيکې پېښې زياتې شوې دي.
د کب په ٢٤مه هم پر دغې لويه لاره د غزني ولايت په اړوند سيمه کې د يو ٣٠٣ موټر د چپه کېدو په پېښه کې ٢١ تنو ته مرګ ژوبله اوښتې وه.
د دغه ولايت د والي وياند شفيق ننګ پژواک ته ويلي وو، دا پېښه د چلوونکي د بې احتياطۍ له امله رامنځ ته شوې، چې په کې يو تن وژل شوى او ٢٠ نور ټپيان دي.
