کابل (پژواک ٦ غويى ٩٣): ايساف په افغانستان کې د يوې چورلکې د غورځېدو په پېښه کې د خپلو پنځو سرتېرو د وژلو کېدو خبر ورکړ.
په هغې خبرپاڼه کې، چې نن له غرمې وروسته د ايساف د مطبوعاتي دفتر له خوا پژواک خبري اژانس ته استول شوې راغلي، چې دا چورلکه د افغانستان په سوېل کې غورځېدله ده.
سرچينې د دې پېښې د کره ځاى او د وژل شوو سرتېرو د هويت په اړه معلومات نه دي ورکړي، خو وايي چې دوى اوسمهال د واقعيت موندنې په لټه کې دي.
په ورته مهال د کندهار ولايت چارواکي وايي، چې دغه چورلکه د ياد ولايت د تخته پل ولسوالۍ د چغري په سيمه کې لوېدلې ده.
ددغه ولايت د مطبوعاتو دفتر وايي، دا پېښه نن ١١ بجې هغه مهال وشوه ، چې په دغه سيمه کې يادې چورلکې تمرينات کول.
سرچينه وايي، په دې پېښه کې ٥ تنه بهرني سرتېري وژل شوي دي.
د ايساف د اى کژوليټي سايټ د معلوماتو پر بنسټ، چې د دغو پنځو سرتېرو په وژل کېدو سره په روان زېږديز کال کې په افغانستان کې د وژل شوو بهرنيو سرتېرو شمېر ٢٧ کسانو ته ورسېد.
دا په داسې حال کې ده، چې د بهرنيو ځواکونو يوه بې پيلوټه الوتکه هم د کونړ په شيکل ولسوالۍ کې غورځېدلې او د دولت دواړه مخالفې ډلې طالبان او د حکمتيار په مشرۍ حزب اسلامي يې د غورځولو ادعا کوي.
