کابل ( پژواک، ٣ وږى ٩٣ ) : په کابل کې داسټراليا سفارت د افغانستان کرکټ بورډ سره د شپږيزې کرکټ سياليو لپاره د لوبې د وسايلو مرسته وکړه.
دغه مرسته د وږي په ٣مه،د اسټراليا د سفارت مرستيال شان فلنګن Shan Flanganد افغانستان کرکټ مسوولينو په شتون کې د پنځو زونونو د لوبډلو مشرانو ته وسپارله.
په دې مراسمو کې د اسټراليا د مرستيال سفير ترڅنګ د افغانستان کرکټ عمومي مشر او سلاکار وزير شهزاده مسعود، د کرکټ بورډ اجرائيوي رييس ډاکټر نور محمد مراد او د پنځو زونونو د لوبډلو لوبډلمشرانو برخه اخيستې وه.
د اسټراليا مرستيال سفيرپه کرکټ کې د افغانستان د وروستيو پرمختګونو ستاينه وکړه او ويې ويل ، چې د افغانستان ملي لوبډلې ډېرې برياوې او اتلولۍ خپلې کړې دي.
هغه زياته کړه، چې په نړيوالو سياليو کې د برياوو ترڅنګ د افغانستان کورني کرکټ او ادارې ډېر پرمختګونه کړي او دکرکټ شل اووريزې شپـږيزې سيالۍ يې يوه بېلګه وبلله.
ټاکل شوې ده، چې د هېواد د پنځو زونونو ترمنځ دشپږيزې ترنامه لاندې د کرکټ شل اووريزې سيالۍ سبا د وږي په ٤مه، په کابل کې پيل شي.
د اسټراليا مرستيال سفير شان فلنګن د پژواک خبري اژانس ديوې پوښتنې په ځواب کې وويل، چې هېواد به يې د افغانستان کرکټ بورډ سره خپلو همکاريو ته ادامه ورکوي.
نوموړي زياته کړه، چې تر نړيوال جام مخکې ، چې ټاکل شوې، په ٢٠١٥ کال کې په اسټراليا کې ترسره شي، د افغانستان ملي لوبډله د تمريناتو لپاره دغه هېواد ته سفر وکړي.
دى وايي ، هڅه به وکړي ، چې د اسټراليا د کرکټ بورډ او افغانستان کرکټ بورډ ترمنځ همکارۍ او اړيکې لا پراخې کړي.
د افغانستان کرکټ بورډ اجرائيوي رييس ډاکټر نور محمد مراد د اسټراليا له مرستو مننه وکړه او هيله يې وښوده، چې دوى به خپلو همکاريو ته ادامه ورکوي.
هغه پژواک اژانس ته وويل ، چې څه موده مخکې يې اسټراليا ته دسفر پر مهال ددغه هېواد له مسوولينو سره د کرکټ په برخه کې د دوامدارو همکاريو په اړه يې ګټورې خبرې کړې دي.










