ميمنه (پژواک ١٦ وږى ٩٣): په فارياب ولايت کې د درېيو ماشومانو په ګډون پنځه کسا په ترافيکي پېښه کې وژل شوي او د همدغه ولايت د ښار جوړونې رييس په يوه وسله وال بريد کې ټپي شوى دى.
دغه پېښه تېر ماښام د ميمنې- اندخوى د لويې لارې په اوږدو کې د ځنګل په سيمه کې د يوهکرولا او بار وړونکي ډمټرک موټر تر منځ د ټکر له امله را منځته شوې ده.
د فارياب د ترافيکو مدير سمونوال عبدالحکيم بختيار وويل چې په دې پېښه کې د کرولا پنځه سپرلي د موټر چلوونکي په ګډون له منځه تللې او درې نور ټپيان دي.
هغه پژواک خبري اژانس ته وويل: ((زموږ د معلوماتو له مخې، د ډمټرک موټر چلوونکى خوب وړى و او د کرولا موټر يوه برخه په ځمکه شوې ده.))
بختيار زياته کړه چې موټر چلوونکى له ساحې تښتېدلى او ټپيان روغتون ته لېږدول شوي دي.
د اندخوى د روغتون امر داکتر سنجر عمر وويل چې د دوو نارينه وو او درېيو ماشومانو مړي، چې عمرونه يې له ٥ تر اتو کلونو دي، له درېيو ټپيانو سره، چې دوې ښځې او يو درې کلن ماشوم دى؛ روغتون ته لېږدول شوي، خو د ماشوم روغتيايي وضعيت نازک او تر درملنې لاندې دى.
هغه زياته کړه، قربانيان د دوو کورنيو غړي دي چې د فارياب له مرکز ميمنې ښار څخه اندخوى ولسوالۍ ته روان وو.
بلخوا د فارياب د ښار جوړونې رييس انجنير نورالله عمر هم نن سهار د همدې لويې لارې په اوږدو کې په يوه وسله وال بريد کې ټپي شوى دى.
د اندخوى ولسوال سلطان سنجر وويل چې د ښار جوړونې رييس په دولتي جيپ موټر کې له ميمنې اندخوى ته روان و، چې په ځنګل سيمه کې پرې سهار شاوخوا ٩ بجې د ناپېژانده وسله والو له خوا بريد وشو.
ولسوال زياته کړه چې بريدګرو د سړک له غاړې پر موټر ډزې وکړې او دى په لاس ټپي شوى دى.
د اندخوى روغتون امر وويل چې د ښار جوړونې رييس ټپونه سرسري دي او په روغتون کې تر درملنې لاندې نيول شوى دى.
د دې پېښې مسووليت تر اوسه چا پر غاړه نه دى اخيستى.
