کابل (پژواک ٣٠ وږى ٩٣): د هېواد ستر ديني عالم او د زرګونو کسانو استاد مولوي عبدالشافي چې د مزينې پر مولوي صاحب مشهور و، په حق رسېدلى دى.
د هغه زوى مولوي فضل هادي د وږي په ٣٠مه پژواک خبري اژانس ته وويل چې مولوي صاحب تېره ورځ د پاکستان د کراچۍ ښار د اغا خان په روغتون کې د ٩٠ کلونو په عمر له دې نړۍ سترګې پټې کړې..
نوموړي زياته کړه چې مولوي صاحب له تېرې څه مودې راهيسې ناروغ و او په دې وروستيو کې يې د درملنې په موخه پاکستان ته وړى و.
فضل هادي وويل چې د هغه د جنازې مراسم به نن له غرمې وروسته د جلال اباد ښار په عيدګاه جومات کې ترسره شي .
ديني عالم او د سياسي چارو کارپوه محمدحسن حقيار د مولوي عبدالشافي پر مړينې د خواشينۍ څرګندولو تر څنګ وايي چې هغه لسګونه زره شاګردان روزلي دي.
هغه زياته کړه، مولوي عبدالشافي چې پر مزينې مولوي صاحب مشهور و، د ننګرهار د روداتو ولسوالۍ د مزينې سيمې اوسېدونکى و.
نوموړي پژواک اژانس ته وويل چې مولوي عبدالشافي د کابل له عربيه دارالعلوم څخه فارغ شوى و او بيا د ننګرهار په لويه دريني مدرسه نجم المدارس کې د استاد په توګه يې دنده ترسره کړه.
حقيار وايي چې په هېواد کې د شوروي اتحاد تر يرغل وروسته د نورو افغانانو په څېر مولوي صاحب هم پاکستان ته مهاجر شو او هلته يې هم د درس او تدريس کار پيل کړ.
ده زياته کړه: ((مولوي صاحب د هجرت تر ټولو مشهور او لويه مدرسه الهجرت والجهاد، دارالعلوم عربيه دره ، اسلامي پوهنتون او يو شمېر نورو ديني مدرسو او دارالعلومونو کې يې تدريس کړى دى.))
