ميمنه (پژواک ٢٥ مرغومى ٩٣): فارياب ولايت کې نن درېيو تنو د يوې ترافيکي پېښې په ترڅ کې ژوند له لاسه ورکړ، يو بل تن د وسله والو مخالفينو له لوري وژل شوى او همدارنګه د يوه ځوان مړى په ځوړند حالت کې موندل شوى دى.
دغه ترافيکي پېښه نن د اندخوى-جوزجان پر لويه لار د يوې کرولا او بار وړونکي هينو موټر د ټکر له امله رامنځته شوې ده.
د فارياب د اندخوى ولسوال سلطان سنجر وايي، چې هينو موټر د خرابېدو له امله د سړک يوې څنډې ته درول شوى و، چې کرولا موټر ورسره ټکر شوى دى.
هغه پژواک خبري اژانس ته وويل، چې په دغه پېښه کې د کرولا موټر درې سورلۍ چې ټول يې نارينه دي؛ وژل شوي دي.
سنجر زياته کړه، چې د هينو او کرولا موټرو چلوونکي اوسمهال تر پوښتنو لاندې دي.
يو بل تن د فارياب په خواجه سبز ولسوالۍ کې د وسله والو مخالفينو له لوري هم وژل شوى دى.
د ولسوالۍ اداري مشر سخي محمد بيګ وايي، چې وژل شوى تن د ولسي ځواک يو غړى و، چې د وسله والو مخالفينو پر وړاندې به يې جګړه کوله او تېره شپه د وسله والو مخالفينو په بريد کې وژل شوى دى.
وسله والو طالبانو د هغه د وژلو مسووليت منلى دى.
همدرانګه د يوه بل ٢٢ کلن ځوان مړى په زندۍ شوي شکل په اندخوى ولسوالۍ کې موندل شوى او سطان سنجر وايي، چې دغه مړى د معاينې لپاره عدلي طب ته لېږدول شوى دى.
د ميمنې ښار د افغان-ترک روغتون د عدلي طب مسوول ډاکټر سمير عنايت وايي، چې د دغه ځوان په مرۍ کې د دوسمال نښې نښانې تر سترګو کېږي.
سيمه ييزو چارواکو ويلي، چې تر اوسه پورې دا څرګنده نه ده چې دغه ځوان ځان وژنه کړې او که د بل چا له لوري زندۍ شوى دى.
