کلات ( پژواک، ٦ سلواغه ٩٣ ): د کابل – کندهار پر لويه لاره د يوې ترافيکي پېښې له امله اته مسافر سخت ټپيان شوي دي.
دا پېښه نن (د سلواغې ٦مه) د زابل اړوند د شهر صفا ولسوالۍ کې پر دې لاره رامنځه شوې ده.
د شهر صفا امنيه قوماندان سردار محمد هوتک پژواک خبري اژانس ته وويل چې پېښه نن له غرمې مخکې شاوخوا يوولس بجې د دې ولسوالۍ د ارهډ مانده په سيمه کې رامنځته شوې ده.
هغه زياته کړه، په ياده سيمه کې د سپرليو يو ٣٠٣ موټر چې له هراته کابل ته پر لاره و، مخامخ يې له ټېلر موټر سره ټکر کړى دى.
امنيه قوماندان وايي چې په دې پېښه کې د ٣٠٣ موټر اتنه سپرلي ټپيان شوي چې په کې ماشومان هم شامل دي.
د نوموړي په وينا، د يو شمېر ټپيانو روغتيايي حالت ښه نه و او د کندهار ميرويس روغتون ته لېږدول شوي دي.
د يادونې ده، نن سهار په کندوز ولايت کې هم د يوې ترافيکي پېښې له امله دوه تنه مړه او ٦ نور ژوبل شوي وو.
