هرات(پژواک، ١٢ کب٩٣): د هرات ځايي چارواکي وايي چې د هرات – فراه لويې لارې په اوږدو کې د يوې ترافيکي پېښې له امله دوه تنه مړه او ٢٩ نور ټپيان شوي دي.
د هرات د والي وياند احسان حيات پژواک خبري اژانس ته وويل چې دغه پېښه نن سهار ٤ بجې د ادرسکن ولسوالۍ په خواجه عوريا سيمه کې رامنځته شوې ده.
حيات زياته کړه چې يو ٣٠٣ مساپر وړونکى موټر له هرات څخه د فراه پر لور روان و، چې د لارې په اوږدو کې له سړک څخه ووت او چپه شو.
د حيات په خبره، په دې پېښه کې دوه تنه مړه شوي، د ښځو او ماشومانو په ګډون ٢٩ نور ټپيان شوي دي.
هغه وويل چې د ټپيانو له منځه د اوو تنو روغتيايي وضعيت نازک ښودل شوى دى.
د هرات ولايت وياند زياته کړه چې پوليس په وخت سره د پېښې ځاى ته رسېدلي او ټپيان يې روغتيايي مرکزونو ته وړي دي.
حيات وويل چې دا ترافيکي پېښه د موټر چلوونکي د نه پام له امله را منځته شوې او په دې اړه د پوليسو څېړنې لا هم روانې دي.
له بلې خوا د هرات حوزوي روغتون وياند محمد رفيق شېرزي وويل چې ددې پېښې ١٣ ټپيان روغتون ته ور وړل شوي دي.
د روان کال په اوږدو کې دا پنځمه ترافيکي خونړۍ پېښه ده چې د هرات – کندهار لويې لارې په اوږدو کې رامنځته کېږي.
