کابل (پژواک، ١٠ ليندۍ ٩) : د امریکا د بهرنیو چارو وزارت ويلي چې د ایران سپاه پاسدران په بهر کې د دغه هېواد د نفوذ زیاتولو لپاره بهرني وسله وال ګوماري.
د امريکا د بهرنيو چارو وزارت په خپله ټويټر پاڼه کې ليکلي: “د ايران سپاه د افغان شیعه ګانو فاطمیون فرقه او د پاکستاني شیعه ګانو زینبیون لوا په سیمه کې او بيا په تېره سوریه کې له جګړې سره د مبارزې لپاره جوړه کړې ده. ”
دې ټوېټونو کې ویل شوي چې امریکا په ۲۰۱۹ کال کې پر دواړو ډلو بندیزونه ولګول.
د امريکا د بهرنيو چارو وزارت زياته کړې، له ترهګرۍ سره د مبارزې د مرکز (ویسټ پاینت) د معلوماتو له مخې، د فاطمیون فرقې کسان له لس تر دوولس زرو رسېږي.
سرچينې زياته کړې: “په ایران کې د فاطمیون فرقې یوه چارواکي د ۲۰۱۸ کال جنورۍ کې ویلى و چې له دوو زرو ډېر وسلوال یې سوریه کې وژل شوي دي. ”
د امریکا د بهرنیو چارو وزارت وايي، د انساني حقونو څارډلې په ۲۰۱۸ کال د ایران له خوا فاطمیون کې د ماشومو سرتېرو ګومارل ثبت او وغندل او هم یې د سوریې جګړه کې د ۱۴ کلنو افغانانو د وژلو سندونه بربنډ کړل.
د يادونې ده، چې د افغانستان حکومت تر دې مخکې په دې اړه غبرګون ښودلى دى.
ايران تراوسه په دې اړه څه نه دي ويلي.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن