جلال اباد (پژواک، ۱۶ لیندۍ ۹۹): د ننګرهار ولايت مدني فعالانو او ولسي خلکو له افغان حکومت او وسله والو طالبانو وغوښتل چې اوربند اعلان کړي او افغان وژنه بنده کړي.
دوی دغه راز د قطره په پلازمېنه دوحه کې د افغان سولې پر مذاکراتي پلاوو غږ وکړ چې د سولې خبرو د کاميابۍ لپاره دې هڅې لا ګړندۍ کړي.
دغه مدني فعالان او ولسي خلک د ليندۍ په ۱۶مه د ننګرهار ولايت د قبايلو او قومونو رياست د غونډو په تالار کې راټول شوي وو او د سولې غوښتونکي شول.
د مدني ټولنو د انسجام شورا مشر عبداللطيف واحدي چې دا غونډه يې رابللې وه، يادونه يې وکړه چې له دغې غونډې يې موخه د سولې د خبرو اترو د برياليتوب غوښتنه ده.
هغه له وسله والو طالبانو او حکومته وغوښتل چې نور دې د افغان وژنې روانه جګړه پای ته ورسوي او له کوم قيد او شرط پرته دې دايمي اوربند اعلان کړي.
دی وايي، جګړه د حل لار نه ده او د اوربند اعلان کولی شي په قطر کې د سولې پيل شوې خبرې اترې برياليتوب ته ورسوي.
هغه زياته کړه: ((د سولې په خبرو کې چې کوم پرمختګ شوی، خوښ یو ورته او هیله مو دا ده چې د سولې بین الافغاني خبرې دې په همدې شان سره یوې هوکړې ته ورسیږي چې جګړه پای ومومي.))
دغه راز د غونډې بل ګډونوال غلام فاروق يوسفي هم ټينګار درلود چې دواړه غاړې بايد لومړی په اوربند سلا شي او وروسته دې د سولې مذاکرات دوامداره وساتي.
هغه وويل، د جګړې په دوام کې د سولې خبرې بې ګټې دي او لکه د اوس په څېر به کلونو کې هم دغه مذاکرات ګټه ورنه کړي.
د غونډې ګډونوالو په دې وروستیو کې پر تعلیمي او یو شمېر نورو ځایونو وسله وال بریدونه هم وغندل او دا یې په هېواد دننه او بهر د څو هېوادونو کار وباله چې نه غواړي د سولې خبرې یوې پایلې ته ورسیږي.
ننګرهار کې د پياوړو ښځو د شبکې مرستيالې ثناء نوري وويل: ((کوم بریدونه چې کېږي، دا ټول د هېواد د دښمنانو کار دی او نه غواړي د سولې خبرې یو نتیجې ته ورسیږي.))
د غونډې یو شمېر ښځينه ګډونوالو په قطر کې د سولې په تړاو بین الافغاني خبرو ته هیله مندي وښوده او د خبرو په جریان کې یې پر اوربند ټینګار وکړ.
ننګرهار کې داسې مهال د سولې په ملاتړ غونډه جوړیږي، چې له شاوخوا درېیو میاشتو بحثونو وروسته په قطر کې افغان حکومت او طالب استازو د سولې په خبرو طرزالعمل وروستی شوی او اوس يې د اصلي خبرو د اجنډا پر جوړولو خبرې روانې دي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن