اسعد اباد (پژوک، ٢٤ مرغومى ٩٩): په کونړ ولايت کې د ٣٣٤ ميليونه افغانيو په لګښت د کارموندنې پروګرام پيل شو.
د کونړ والي محمد اقبال سعید د دغه پروګرام په پيل کې وويل چې د کارموندنې پروګرام د دولت له هغو پروګرامونو دی چې له مخې یې راستنېدونکو، داخلي بېځایه شوو او مېشتو خلکو ته رسېدنه کوي.
هغه د یاد پروګرام پیل د کونړ خلکو، په ځانګړې توګه د اسعد اباد ښاریانو لپاره ښه زیری وباله او له ټولو یې وغوښتل چې د ښه تطبیق لپاره یې لاس یو کړي.
د کارموندنې پروګرام عملیاتي مسوول عبدالباري احمدزي ياد پروګرام د ښار پرمختګ او ښاریانو ته د بوختیاوو رامنځته کولو لپاره مهم وباله او د ښه تطبیق په برخه کې یې پر ګډو همکاریو ټینګار وکړ.
د اسعد اباد ښاروال جواز باز وايي، ياد پروګرام د ښار په څلورو ناحیو کې د ۵۰ شوراګانو او ګذرونو له خوا پر مخ وړل کېږي چې د ښار انکشاف ترڅنګ به خلکو ته کاري فرصتونه رامنځته او د دوی په خوښه به ګټورې پروژې تطبیق شي.
د ولسي جرګې غړي جاوېد ساپي، ولایتي شورا منشي جمال الدین سیار، د ښاروالۍ مشورتي بورډ مرستیال، اجرائیه ریاست پخواني سلاکار نصرالله ساپي او نورو ویناوالو د ياد پروګرام پیل د کاري فرصتونو، رغونې او ښاري انکشاف په برخو کې ګټور وباله او په دغه ولایت کې یې د ورته نورو ګټورو پروژو د تطبیق غوښتنه وکړه.
Visits: 25
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن