په کابل ښار کې چاودنې درېیو کسانو ته مرګ ژوبله واړوله

<p style="text-align: justify;">کابل (پژواک، ۱۳ سلواغه ۹۹): د کابل پولیس وایي چې په کابل ښار کې د ملي اردو پر موټر چاودنه کې دوه کسان وژل شوي او یو بل ټپي دی.</p>

<p style="text-align: justify;">د کابل امنیې قوماندانۍ ویاند فردوس فرامرز د دی پېښې د تایید ترڅنګ وویل چې دغه چاودنه نن غرمه دوولس بجې د کابل ښار اوومې حوزې اړوند په جنګلک سیمه کې شوې ده.</p>

<p style="text-align: justify;">هغه زیاته کړه چې په پېښه کې یو امنیتي منسوب او یو ملکي وګړی وژل شوي او یو بل کس ټپي دی.</p>

<p style="text-align: justify;">تر اوسه چا د دې پېښې مسوولیت پر غاړه نه دی اخیستی.</p>

<p style="text-align: justify;">دا په داسې حال کې ده چې نن سهار د کابل ښار په شهید څلورلاره کې د سولې په چارو کې د دولت  وزارت د دفتر د رییس پر موټر چاودنه وشوه او په یوه بله پېښه کې د کابل ښار پنځمه ناحیه کې د ملي امنیت یو کارکوونکی ووژل شو.</p>

<p style="text-align: justify;">د یادونې ده، په دې وروستیو کې په کابل ښار کې د ماین چاودنو ډېرېدو د کابل ښاریان سخت اندېښمن کړي دي.</p>