کابل (پژواک، ٣١ غبرګولى ١٤٠٠): د عامې روغتيا وزارت وايي چې په تېرو ٢٤ ساعتونو کې د کرونا ١٨٤٧ مثبتې پېښـې ثبت شوې او ٧٨ کسان يې له امله مړه شوي دي.
د عامې روغتيا وزارت له لوري د غبرګولي په ٣١ مه پژواک خبري اژانس ته په رالېږل شوې خبرپاڼه کې راغلي چې په تېرو ٢٤ ساعتونو کې د هېواد په لابراتوارونو کې د کرونا ويروس ٤٦٢٩ شکمنې پېښې معاینه شوې چې ١٨٤٧ يې مثبتې دي.
سرچينه وايي چې د يادو پېښو په ثبتېدو سره په هېواد کې پر کرونا ويروس د اخته کسانو شمېر ١٠٥٧٤٩ ته لوړ شو.
د عامې روغتيا وزارت د معلوماتو له مخې، په تازه ثبت شوو پېښو کې ٣١٢ په کابل، ٢٢٨ په ننګرهار، ١٢٥ په جوزجان، ١١١ په دايکنډي، ٨٦ په غزني، ٧٥ په هرات، ٧٤ په بلخ، ٧٣-٧٣ په کندهار، میدان وردګ او پروان، ٦٥ په تخار، ٦٤ په کونړ، ٦٢ په فراه، ٥٤ په سمنګان، ٤٩ په غور، ٤٢ په کاپيسا، ٤١ پنجشېر، ٣٨ په فارياب، ٣٦ په کندوز، ٣٣ په لغمان، ٣٠-٣٠ په هلمند او پکتيا، ٢٧ په زابل، ١٦ په بدخشان، ١٣-١٣ په اروزګان او خوست او ٤ په بادغيس ولايت کې په کرونا ويروس اخته شوي دي.
خبرپاڼه کې زياته شوې چې په تېرو ٢٤ ساعتونو کې ٦٧٠ کسان له کرونا ناروغۍ بېرته روغ شوي چې له دې سره په هېواد کې له کرونا ناروغۍ د بېرته روغ شوو کسانو شمېر ٦٥٠٧١ ته ورسېد.
د عامې روغتيا وزارت خبرپاڼې له مخې، په تېرو ٢٤ ساعتونو کې د کرونا ويروس له امله ٧٨ کسان مړه شوي چې په دې سره له دې ناروغۍ د ټولو مړه شوو کسانو شمېر ٤٢٩٣ ته ورسېد.
د يادونې ده چې تر اوسه په ټوله نړۍ کې څه باندې ١٧٨ ميليون کسان په کرونا اخته شوي چې له دې شمېر څخه ١٦١ ميليونه يې بېرته روغ شوي، خو څه باندې ٨،٣ ميليونه نور يې له امله مړه شوي دي.
