کابل (پژواک، ۱۹ چنګاښ ۱۴۰۰): ولسمشر اشرف غني د هېواد له تر ټولو په امن ولایت (خوست) کې د هېواد پنځم نړیوال هوایي ډګر پرانيست.
له ارګه د چنګاښ په ۱۹مه پژواک اژانس ته په رالېږل شوې خبرپاڼه کې راغلي چې ولسمشر اشرف غني د یوه لوړپوړي پلاوي په مشرۍ نن سهار وختي خوست ولایت ته سفر وکړ.
سرچینې زیاته کړې چې ولسمشر او ملي پلاوي یې هلته له رسېدو سره سم د خوست نوی جوړ شوی نړیوال هوایي ډګر پرانيست.
د هوایي ډګر له پرانيستل کېدو وروسته د متحده عربي اماراتو له دوبۍ ښاره د اریانا هوایي شرکت یوه الوتکه چې مسافر راوړي وو، هم د خوست هوایي ډګر ته را ورسېده چې د ولسمشر غني له خوا یې تود هرکلی وشو.
ولسمشر غني د هوایي ډګر له بېلابېلو ساحو لیدنه هم وکړه.
ټاکل شوې چې ولسمشر غني د دغه ولایت له امنیتي او ملکي چارواکو سره پر امنیتي موضوعاتو هم خبرې وکړي.
د یادونې ده، تر اوسه د کابل، کندهار، هرات او مزارشریف له هوایي ډګرونو نړیوالې الوتنې کېدې او خوست پنځم هوایي ډګر شو چې نړیوالې الوتنې به ترې کېږي.
Visits: 83
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن