کابل (پژواک، ۱۶ وږی ۱۴۰۰): د رسنیو او خبریالانو د قضیو د څېړنې کمېټې په مرسته ۱۴ کورني او بهرني خبریالان چې کابل کې د لاریون د پوښښ پر مهال نیول شوي وو، خوشې شول.
دغه څرګندونې د افغانستان د خپلواکو ژورنالېستانو ټولنې په خپلې فیسبوک پاڼې کې لیکلي دي.
نن په کابل کې یو شمېر کسانو د پاکستان پر ضد او پنجشېر کې د «مقاومت جبهې» په ملاتړ لاریون وکړ، خو په سیمه کې موظفو امنیتي کسانو هوایي ډزې وکړې او لاریونوال خواره واره شول.
د سرچینې په وینا، د رسنیو او خبریالانو د قضیو څېړنې کمېټې په هڅو نن (سه شنبه) ۱۴ هغه خبریالان چې کابل کې د لاریون پر مهال نیول شوي وو، بېرته خوشې شول.
د دغې کمېټې مشري د طالبانو د فرهنګي کمېسیون مرستیال احمدالله وثیق کوي.
یادې ټولنې له خبریالانو سره دغه ډول چلند غندلی او له طالبانو یې غوښتي چې د دغسې پېښو د پوښښ لپاره مناسبې اسانتیاوې برابرې کړي ترڅو له خبریالانو سره له تاوتریخوالي لاس واخیستل شي.
Visits: 138
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن