کابل (پژواک، ۹ لړم ۱۴۰۰): د سرپل ولایت مستوفیت په داسې حال کې تېره یوه میاشت کې پنځه میلیون افغانۍ عایدات ترلاسه کړي چې ځینو عایداتي ادارو تر اوسه فعالیت نه دی پیل کړی.
د سرپل ولایت د مستوفیت سرپرست مولوي محمد صادق حکیمي وايي چې د دغه ولایت د مستوفیت تر یوې میاشتې فعالیت وروسته توانېدلي چې د بېلا بېلو اصنافو پنځه میلیون افغانۍ عایدات ترلاسه کړي.
د ده په خبره، دغه عایدات په داسې حال کې ترلاسه شوي چې ځينې عایداتي ادارو لکه پاسپورټ مدیریت، احصایې ریاست او نورو تر اوسه فعالیت نه دی پیل کړی.
هغه وايي، د دې ادارو د کار په پیلېدو سره عایدات ډېرېږي.
حکیمي له مالیه ورکوونکو رضایت ښودلی او وايي، دوی په ډېره لېوالتیا سره مالیات ورکوي.
د هغه په خبره، دا پنځه میلیون افغانۍ یې په تېره یوه میاشت کې په داسې حال کې ترلاسه کړې چې مخکني حکومت د روان کال په تېرو پنځو میاشتو کې د ټولو عایداتي سرچینو د فعالیت په صورت کې ۶۶ میلیون افغانۍ ټولې کړې دي.
نوموړی وايي چې د ټولو ادارو په فعالېدو سره د دغه ولایت د مستوفیت عایدات ډېرېږي.
Visits: 27
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن