جلال اباد (پژواک، ۹ مرغومی ۱۴۰۰): د ننګرهار امنيه قومانداني وايي چې د دغه ولايت د بهسودو او غني خېلو په ولسواليو کې يې د غلا او جعلکارۍ په تور پنځه کسان نيولي دي.
چارواکي وايي، له نيول شوو کسانو څلورو یې يو موټر غلا کړی و چې له موټر سره يو ځای نيول شوي دي.
د ننګرهار د امنيې قوماندانۍ وياند عبدالبصير زابلي د مرغومي په ۹مه پژواک اژانس ته وويل چې د بهسودو ولسوالۍ امنيتي منسوبينو په دې ولسوالۍ کې د يو الټو موټر د غلا په تور څلور کسان نيولي دي.
دی زياتوي، نيول شوو کسانو پر خپل جرم اعتراف کړی او اوس امنيې قوماندانۍ کې تر پلټنو لاندې دي.
د قوماندانۍ وياند وايي چې يو کس په غني خېلو ولسوالۍ کې د جعلکارۍ په تور نيول شوی دی.
د عبدالبصير زابلي د معلوماتو له مخې، د غني خېلو منسوبينو په مارکو بازار کې يو تن له ۱۵۰۰ جعلي ډالرو سره يوځای په داسې حال کې نيولی چې دغه جعلي ډالر يې تبادله کول.
