پلخمري (پژواک، ۸ کب ۱۴۰۰): د بغلان ولایت په دوشي ولسوالۍ کې د خلکو له خوا د ۲۳ میلیونه او ۷۰۰زره افغانیو په مالي لګښت د یوه پول د جوړېدو کار پیل شو.
دغه پول چې ۶۳ متره اوږدوالی لري، د دوشي ولسوالۍ په اتمانخېلو کلي کې د پلخمري سیند له پاسه جوړېږي چې شاوخوا لس زره کورنیو ته به پرې د تګ راتګ اسانتیا برابره شي.
د یادې سیمې اوسېدونکو په همدې موخه نن (يکشنبه) د دوشي ولسوالۍ د اتمانخېلو په نوم کلي کې جوړې شوې غونډه کې له حکومتي چارواکو هم د پله په جوړېدو کې د مرستې غوښتنه وکړه.
له ډلې یې حاجي اسلم اتمانخېل وویل، له دوه نیم سوه کلونو راهیسې په دغه کلي کې خلک ژوند کوي، ماشومان او لویان په دغو اوبو ښار ته تللي راغلي یو، خو چا پول جوړ نه کړ.
ده زياته کړه: «که د کلي خوا کې پر سیند پول جوړ شوی وای، کلي کې به یې ښوونځی او کلینیک درلود، دا چې عمومي سړک ته لار نه لري، نو له امله یې کلینیک او ښوونځی هم نشته چې تېر لسګونه کلونه یې د ژوند سختۍ تېرې کړې دي او اوس غواړي په خپلو پیسو پول جوړ کړي.»
د همدې سیمې بل قومي مشر محمد ایوب وایي، دغه پول چې نن يې د حکومتي چارواکو په مخکې د جوړېدو پرانيسته وکړه، د همدې سیمې د اوسېدونکو او حکومت په مرسته به جوړېږي چې تر دې دمه یواځې د ۱۰۰۰ بورۍ سمنټو د مرستې ژمنه شوې ده.
دی وايي: «پر دغه پول شاوخوا دوه سوه زره ډالر لګښت راځي، تراوسه کابو ۵۰زره ډالر راغونډ شوي، د هغو کورنیو چې په بهرنیو هېوادونو کې خپل خپلوان دي، هغوی هم مرسته کړې ده، خو دا بسنه نه کوي، د ولایت مقام څخه غواړو چې د دغه پول په جوړېدو کې له دغو خلکو سره مرسته وکړي.»
د دغې سیمې نور اوسېدونکي هم وايي، تېر شل کاله یې له اړوندو ادارو د پول جوړولو غوښتنه وکړه، خو د وخت حکومتي چارواکو دغې سیمې ته د لارې جوړولو نیت نه وو.
د بغلان د اطلاعاتو او فرهنګ رئیس مولوي مصطفی هاشمي خلکو ته وینا کې د سیمې د اوسېدونکو له خوا د پول جوړېدو د کار ستاینه وکړه .
هغه وویل، د خلکو دغه ګام ښيي چې د نورو له مرستو پرته هم افغانان کولای شي د هېواد د ابادۍ چارې مخته یوسي، حکومت یې ستایي او تر خپل توان همکاري هم کوي.
د یاد ولایت د امنیت آمر مولوي شېرعلي حیدري د بغلان ولایت مقام په استازیتوب د دغه پول په جوړېدو کې د ۱۰۰۰ بوریو سمنټو د مرستې ژمنه وکړه او د پول جوړولو چارو کارکوونکو ته یې د امنیت ډاډ هم ورکړ.
ده وويل، د ظهرابي سیمې اوسېدونکو سختې شپې او ورځې تېرې کړي، اوس یې وخت دی چې باید لارې او پلونه یې جوړ شي.
دا لومړی ځل دی چې په بغلان ولایت کې د خلکو له خوا په خپل مالي لګښت پول جوړېږي.
