ژبه

ایا له پژواک سره د ګډون حساب نه لرئ؟

د ګډون لپاره کښېکاږئ.

تېره اوونۍ په افغانستان کې ۲۸ کسانو ته مرګ ژوبله اوښتې ده

تېره اوونۍ په افغانستان کې ۲۸ کسانو ته مرګ ژوبله اوښتې ده

author avatar
19 Mar 2022 - 18:25
تېره اوونۍ په افغانستان کې ۲۸ کسانو ته مرګ ژوبله اوښتې ده
author avatar
19 Mar 2022 - 18:25

کابل (پژواک، ۲۸ کب۱۴۰۰): تېره اوونۍ په هېواد کې ۲۸ کسانو ته مرګ ژوبله اوښتې ده، بلخوا د ملګرو ملتونو امنیت شورا په افغانستان کې د یوناما ماموریت د یوه بل کال لپاره وغځاوه او یاد سازمان ویلي چې هڅه کوي د افغانستان لپاره نړۍوال حیثیت پیدا کړي.

د تېرې اوونۍ مهم خبرونه:

  • د ملګرو ملتونو امنیت شورا په افغانستان کې د یوناما ماموریت د یوه بل کال لپاره وغځاوه.
  • ملګري ملتونه هڅه کوي چې افغانستان یو نړيوال حیثیت ولري او په دې برخه کې خپلو هڅو ته دوام ورکوي.
  • افغانستان ته د بشري مرستو جلبولو لپاره د ملګرو ملتونو، بریتانیا، جرمني او قطر نړیوال کنفرانس جوړېږي.
  • د افغانستان د بهرنيو چارو وزارت د ترکمنستان لپاره نوی سرپرست سفير وګوماره.
  • په امريکا کې د افغانستان سفارت او قونسګرۍ وتړل شول.
  • جاپان له افغانستان سره درې میلیون ډالره مرسته وکړه.
  • له افغان شخصیتونو سره د اړيکو او هېواد ته د هغوی راستنولو کمېسیون جوړ شو.
  • تېره اوونۍ په افغانستان کې ۲۸ کسانو ته مرګ ژوبله اوښتې ده.

مرګ ژوبله:

تېره اوونۍ په افغانستان کې لږ تر لږه ۲۱ کسان وژل شوي او اووه نور ټپيان شوي؛ په دې مرګ ژوبله کې د طبیعي پېښو ارقام نه دي شامل.

د راپورونو له مخې، د پکتيا په څمکنيو ولسوالۍ کې يو ملکي وګړى د امنیتي کس له خوا پر ډزو ووژل شو، دغه راز د اروزګان په خاص اروزګان ولسوالۍ کې ناپېژاندو وسله والو د تېر حکومت یو پولیس قوماندان او سرتېری وژل شوي او همدارنګه د غور د شهرک ولسوالۍ د پېژند امر د يوه امنيتي سرتېري له لوري وژل شوی دی.

راپورونه ښيي، د بادغيس په مرکز قلعه نو ښار کې خاوند خپله مېرمن وژلې، یو کس د غور په مرکز فيروزکوه کې په مرموز ډول يو تن وژل شوي، د پخواني حکومت یو سرتری په هرات ښار کې او یو کس د فارياب په خان چارباغ ولسوالۍ کې وژل شوي دي.

دغه راز د راپور له مخې، د هلمند په نوزاد ولسوالۍ یوه کور ته لاسي بم غورځول شوی و چې له امله يې يو کس وژل شوی او څلور تنه نور ټپيان وو، دغه راز د همدغه ولايت په ګرمسېر ولسوالۍ کې د يو وژل شوي کس مړی موندل شوی و، په فراه ښار کې ناپېژاندو وسله والو یو کس پر ډزو وژلی و او په کابل ښار کې هم یو صراف د ناپېژاندو وسله والو له خوا ووژل شو.

تېره اوونۍ د کاپيسا په محمودراقي ښار کې یوه مېرمن د ناپېژاندو وسله والو له خوا وژل شوې وه، یو کس د تخار په دشت کلا ولسوالۍ وژل شوى و او د نیمروز په زرنج ښار کې هم یو کس د خپل دوکان مخې ته ووژل شو او دوه نور ټپيان وو. همدارنګه یو کس د پنجشېر په خنج ولسوالۍ او یو کس بیا د لوګر په پل علم کې وژل شوي وو.

دغه راز تېره اوونۍ د کندهار په شاولیکوټ ولسوالۍ کې چاودنې د څلور ماشومان ژوند واخيست او یو کس د غور په مرکز فېروزکوه ښار کې د چاودنې له امله ټپي شوی و.

د راپورونو له مخې، وړمه اوونۍ په افغانستان کې لږ تر لږه ۱۸ کسان وژل شوي او ۱۷ نور ټپيان وو.

دا په داسې حال کې ده چې د روان کال د زمري میاشتې له تحول مخکې، هره اوونۍ په جګړو کې سلګونو کسانو ته مرګ ژوبله اوښته.

په افغانستان کې د یوناما ماموریت دوام

تېره اوونۍ له روسیې پرته د ملګرو ملتونو امنیت شورا ټولو غړو په افغانستان کې د دغه سازمان د یوناما ماموریت د یوه بل کال غځولو لپاره مثبته رایه ورکړه.

دغه راز د ملګرو ملتونو په پرېکړه لیک کې د مرستو پر رسولو، د ټولګډون حکومت پر جوړېدو او پر اوږودمهاله سولې او ثبات ټینګار شوی دی.

د افغانستان سرپرست حکومت او د افغانستان لپاره د امریکا متحده ایالتونو شارژدافیر د یوناما ماموریت غځېدو هرکلی کړی دی.

د افغانستان نوي حکومت ته د نړيوال حیثیت ورکولو لپاره هڅې او تعامل

د کډوالو په چارو کې د ملګرو ملتونو کمېشنر وايي، ملګري ملتونه هڅه کوي چې افغانستان یو نړيوال حیثیت ولري او دغه سازمان په دې برخه کې خپلو هڅو ته دوام ورکوي او د ملګرو ملتونو د سرمنشي ځانګړې استازې وایی، ډېری هېوادونه د افغانستان له سرپرست حکومت سره همکارۍ ته لېوال دي.

د افغانستان د بهرنيو چارو وزارت د ترکمنستان په پلازمېنه عشق‌اباد کې د افغانستان سفارت نوی سرپرست ورمعرفي کړ او د بهرنیو چارو وزارت سرپرست وزیر مولوي امیرخان متقي د ترکیې په انقره کې د افغانستان له سفارته لیدنه وکړه.

خو دا په داسې حال کې ده چې په امريکا کې د افغانستان سفارت او قونسګرۍ د بودجې نشتوالي او پر رسمیت نه پېژندنې له امله وتړل شو او د بهرنیو چارو وزارت سرپرست بيا وايي چې کابل د افغانستان له ډېرو سفارتونو سره اړیکه لري او له مخالفو سیاستوالو غواړي چې نور له مخالفته لاس واخلي.

له افغان شخصیتونو سره د اړيکو او هېواد ته د راستنولو کمېسیون

تېره اوونۍ د افغانستان کابینې له افغان شخصیتونو سره د اړیکو ټینګولو او هېواد ته د هغوی د بېرته راستنولو کمېسیون جوړښت تصویب کړ.

دا په داسې حال کې ده چې په هېواد کې د تېرې زمري میاشتې له تحول وروسته یو شمېر افغان شخصیتونه بهرنیو هېوادونو ته تللي او ځیني یې له پخوا په بهر کې مېشت دي.

پخواني ولسمشر حامد کرزي د ياد کمېسيون جوړېدو هرکلی کړی او دا کار يې په هېواد کې تلپاتې سولې او ثبات د ټينګښت لپاره غوره کړنه بللې ده.

د افغانستان لپاره د اروپايي ټولنې سفير هم د ياد کمېسيون د جوړېدو د هرکلي ترڅنګ ويلي، په دغه کار سره به افغان حکومت د مشروعيت ترلاسه کولو په برخه کې يو پرمختګ وي.

د افغانستان د بهرنیو چارو پخواني وزیر حنیف اتمر د افغانستان له سرپرست حکومته غوښتي چې له سیاستوالو سره د اړیکو او د هغوی راستنولو په موخه د جوړ شوي کمېسیون ماموریت او صلاحیتونه دې له خلکو سره شریک شي.

د بشري مرستو دوام

په افغانستان کې د ملګرو ملتونو د ماشومانو صندوق وايي، جاپان له افغانستان سره د مرستې په موخه له یاد صندوق سره درې میلیونه ډالر مرسته کړې او تېره اوونۍ افغانستان ته د بشري مرستو په موخه ۲۳ میليون ډالر مرکزي بانګ ته راورسېدل.

دغه راز مالیزیا له افغانستان سره د ۱.۶ میلیونه ډوزه کرونا ضد واکسین مرسته کوي او د ملګرو ملتونو د وګړو صندوق یا (UNFPA) په افغانستان کې د بشري بحران پر زیاتېدو اندېښنه ښودلې او ویلي يې دي چې دوی په افغانستان کې ۹.۲۸ میلیون وګړو ته د بشري مرستو رسول په پلان کې لري.

د ملګرو ملتونو د بشري مرستو د همغږۍ اداره وایي، تر راتلونکو دوو اوونیو پورې به له افغانستان سره د بشري مرستو جلبولو په موخه د ملګرو ملتونو، بریتانیا، جرمني او قطر په همکارۍ نړیوال کنفرانس جوړیږي.

د ملګرو ملتونو يوه لوړپوړي چارواکي په افغانستان کې اقتصادي وضعیت د اندېښنې وړ ګڼلی او له نړۍ يې غوښتي چې له دغه هېواد سره د بشري مرستو په برخه کې کوټلي ګامونه واخلي.

تېره اوونۍ، د افغانستان او ترکیې د بهرنیو چارو وزیرانو، د کابل هوايي ډګر په ګډون د افغانستان نړیوالو هوايي ډګرونو پر موضوع د خبرو ترڅنګ په دې اړه د تړون پر ځینو مادو هم بحث کړی.

په اسلام‌ اباد کې د او. ای. سي غونډه

ټاکل شوې د اسلامي همکاريو سازمان د غړو هېوادونو د بهرنيو چارو وزیرانو ۴۸مه ناسته روانه اوونۍ د پاکستان په پلازمېنه اسلام اباد کې جوړه شي او د نورو موضوعاتو ترڅنګ د افغانستان پر وضعيت هم خبرې وشي.

Hits: 154

اړیکه ونیسئ

د کیسې وړاندیز وکړئ

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

د پژواک اپلیکېشن

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.