جلال اباد (پژواک، د وري لومړۍ نېټه ۱۴۰۱): د ننګرهار مرکز جلال اباد ښار کې د دوو موټرو د ټکر له امله د څلورو ښځو او یوه ماشوم په ګډون اته کسان مړه او پنځه نور ټپيان شوي دي.
د ننګرهار ولايت د ترافيکو مدير سمونوال جواد شېرزاد د وري په لومړۍ نېټه پژواک اژانس ته وويل چې نن له مازديګر وروسته شاوخوا پنځه بجې د جلال اباد ښار د شپږمې ناحيې اړوند خالص فاميلو چوک ته څېرمه په رينګ روډ سړک باندې دوو موټرو ټکر کړی دی.
هغه زياته کړه چې پېښه د ډاډسن چې کډه په کې بار وه او کرولا موټرو د ټکر له امله رامنځ ته شوې ده.
دی وايي چې په دې پېښه کې څلور ښځې، درې تارينه او يو ماشوم مړه او دوه کسان (يو نارينه او يو ښځه) ټپيان دي.
د نوموړي د معلوماتو له مخې چې یاده پېښه د موټر چلوونکي د بې احتياطۍ له امله رانځته شوې او د يو ټپي روغتيايي حالت هم نازک ښودل شوی دی.
د نقيب الله په نوم د پېښې يو عيني شاهد پژواک ته وويل چې ترافيک پولیس سيمې ته رسېدلي، مړه او ټپيان روغتون ته وړل شوي دي.
د یو بل خبر له مخې، د هلمند په ګرمسېر ولسوالۍ کې هم د ترافیکي پېښې له امله یو کس مړ شوی دی.
د هلمند ولایت د اطلاعاتو او کلتور ریاست مرستیال مولوي محمد قاسم ریاض پژواک ته وویل، د دغه ولایت د ګرمسېر ولسوالۍ اړوند په کوچني دروېشان سیمه کي د یوه لوی موټر او موټرساېکل ترمنځ د ټکر له امله یو کس مړ شوی دی.
Visits: 336
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن