[restrict paid="true"]
کابل (پژواک، ۹غبرګولی ۱۴۰۱): د عامې روغتیا وزارت د کابل ښار په نور روغتون کې، د لېزر په وسیله د سترګو او د سترګو د پردې لرې کولو عملیاتو ترڅنګ، د سترګو د ځینو نورو پېچلو عملیاتو د پیل خبر ورکوي.
دغه برخې د «پاکستان الخدمت بنسټ» په مالي مرسته د ۲۰ میلیونه او ۳۰۰زره پاکستاني کلدارو په لګښت تجهیز او فعالیت یې پیل کړ چې د سترګو د پلاستيک جراحۍ، سوءشکل، د تومورونو او د سترګو پردې لرې کولو عملیات پکې ترسره کېږي.
د عامې روغتیا وزارت مقام د دفتر رییس مولوي محمد داوود منصوري، د یادې برخې د پرانیستې په مراسمو کې د یادو دوو برخو فعالېدل په هېواد کې د روغتیايي خدمتونو د کیفیت ښه کېدو او لوړولو په برخه کې اغېزناک ګام وباله او زیاته یې کړه: «زه د افغانستان د خلکو او عامې روغتیا وزارت په استازولۍ له پاکستان هېواد او الخدمت بنسټ له مسوولینو په نور روغتون کې د دغو برخو پرانیستلو له امله مننه کوم.»
هغه زیاته کړه: «د دغو برخو په فعالېدو سره، زموږ ډاکټران کولای شي چې په دغه روغتون کې ناروغانو ته د سترګو عملیات او روغتیايي خدمات وړاندې کړي او بهر ته د ډېرو خلکو د تګ مخه نیول کېږي.»
منصوري په بهر کې له مېشتو افغان کدرونو وغوښتل چې بېرته هېواد ته راستانه شي او خپلو اړو هېوادوالو ته خدمت وکړي.
په ورته مهال، د «نور د سترګو ملي او تخصصي روغتون» رییس ډاکټر ظاهرګل ځدراڼ په یادو مراسمو کې وویل، نن په نور روغتون کې دوې برخې «Retina او Occuloplasty » فعالې او ګټې اخیستنې ته وسپال شوې.
نوموړي زیاته کړه، دا لومړی ځل دی چې په تېرو ۵۰ کلونو کې یادې برخې په دغه روغتون کې فعالیت پیلوي.
سرچینې زیاته کړه، د دغو تجهیزاتو په وسیله به د سترګو د پلاستيک جراحۍ، سوءشکل، د تومورنو او د سترګو د پردې لرې کولو عملیات ترسره شي.
نوموړی وايي، د الخدمت بنسټ په همکارۍ د سترګو د پاکستاني متخصصینو یوه شپږ کسیزه ډله هم افغانستان ته راغلې او په په یاد روغتون کې به د ناروغانو وړیا معاینه او درملنه کوي.
[/restrict]
