کلات، سمنګان (پژواک، ۱۲ چنګاښ ۱۴۰۱): د زابل د عامې روغتیا ریاست له خوا د دغه ولایت پر ۱۰زره کورنیو د روغتیا ساتنې د کیټونو وېش پیل شو.
د دغه ولایت د عامې روغتیا رییس ډاکټر عبدالحکیم حکیمي پژواک خبري اژانس ته وویل، د حفظ الصحې یا روغتیا ساتنې دا کیټونه د ملګرو ملتونو د ماشومانو د ملاتړ صندوق/UNICEF له خوا چمتو شوي چې د لاس مینځلو صابون، د غاښونو برس او کریم، د اړتیا وړ درمل او نور توکي په کې شامل دي.
هغه زیاته کړه، دا کیټونه به د زابل په مرکز او ۱۱ ولسوالیو کې پر ۱۰زره کورنیو ووېشل شي چې نن یې د وېش چارې له شاجوۍ ولسوالۍ پيل شوې.
نوموړی وايي، دغه روغتیايي کیټونه له هغه وروسته پر خلکو وېشي چې په دې وروستیو کې د زابل مرکز کلات، شاجوی، سیوري، ارغنداب، ښار صفا او یو شمېر نورو ولسوالیو کې کولرا ته ورته د نس ناستې ناروغي خپره شوه.
د هغه په خبره، په یاد شوو سیمو کې شاوخوا ۱۵۰۰ کسان پر دې ناروغۍ اخته شوي وو چې د ټولو درملنه شوې ده.
خلک خوښ دي چې د روغتیا ساتنې د کیټونو مرسته ورسره کېږي.
د شاجوی ولسوالۍ یوه اوسېدونکي محمد الله پژواک خبري اژانس ته وویل، په دغو کیټونو کې د لاس مینځلو د صابون او د غاښونو د کریم او برس په ګډون، د اړتیا وړ یو شمېر توکي شامل دي چې د ناروغیو په کنټرول کې مرسته کولای شي.
خو ده غوښتنه وکړه چې اړوندې ادارې دې د دوی په سیمه کې خلکو ته د څښاک پاکو اوبو شبکې جوړې کړي څو ماشومان او لویان له ناروغیو وساتل شي.
د یوه بل خبر له مخې، په سمنګان کې هم پر لسګونو کورنيو روغتيايي بستې وېشل شوې دي.
د سمنګان د کليو د بیارغونې او پراختيا ریاست د مطبوعاتو مسئول ثمرالدين شاهروخي وايي، د يونسیف په مرسته د (ORD) دفتر له خوا د کليو د پراختيا له ریاست سره په همغږۍ نن د حضرت سلطان ولسوالۍ د نواباد سیغانچي کلي ۱۵۴ کورنيو ته دغه بستې ووېشل شوې.
د ده په وينا، په دې بستو کې ۱۴ توکي شامل وو.
Visits: 65
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن