هرات ښار (پژواک، ۲۷ چنګاښ ۱۴۰۱): په هرات ولایت کې د خراسان په نوم د صرافۍ مارکېټ په بازار کې پر زړو بانکنوټونو د ستونزې راپورته کېدو له امله د صرافانو او خلکو پر مخ وتړل شو.
د هرات د صرافانو اتحادیې رییس غلام محمد سهرابي له رسنیو سره په خبرو کې د دغه خبر د تاییدولو ترڅنګ وویل، د هرات ولایت د صرافانو اتحادیې غړو پرېکړه کړې چې نن (دوشنبه) به د اسعارو مارکېټ د هر ډول ګډوډۍ او زړو پیسو د مخنیوي په موخه چې یوه جدي ستونزه ګرځېدلې ده، وتړل شي.
د سهرابي په خبره، تر څو چې د زړو او له کاره لوېدلو بانکنوټونو ستونزه هواره نه شي، د اسعارو د تبادلې دغه مرکز به تړلی وي.
په ورته مهال، د هرات په بازارونو کې د زړو پیسو شتون د دغه ولایت د اوسېدونکو اندېښنې راپارولې دي.
د ليلما په نامه د یوه ښوونځي ښوونکې پژواک ته وويل، له دوو مياشتو وروسته يې خپل د استادۍ معاش ترلاسه کړ؛ خو په بازار کې له هغې د ۸ زره افغانیو بانکنوټونه نه اخیستل کېږي.
د هغې په وينا، هغه پيسې چې ورسره دي، ناچلې نه دي، خو دا چې زړې دي نو ځکه یې څوک پّه نیمه بیه هم نه اخلي.
پژواک وغوښتل چې په دې اړه د هرات د سيمهييزې ادارې نظر هم ترلاسه کړي، خو د ولايتي ادارې وياند مولوي حميدالله متوکل له بيا بيا هڅو سره سره په دې اړه ځواب ورنه کړ.
د يادونې ده چې د هېواد د لوېديځ زون په بازارونو کې د زړو او له کاره لوېدلو بانکنوټونو شتون پر یوي جدي ستونزې بدله شوې چې ان بانکونه يې په ورځنيو راکړو ورکړو کې له خلکو څخه نه اخلي.
Visits: 18
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن