کابل (پژواک، ۳ زمری ۱۴۰۱): د طب پوهانو په ځینو انټرنټي سایټونو کې په دې اړه خپاره شوي مطالب چې له کرونا رغيدلي ځیني کسان د ویښتانو له تویېدو سره مخ کېږي، تاییدوي او وایي، پر دې ناروغۍ اخته کسان د بدن معافیت سیسټم کمزوري کېدو او روحي فشار له امله له دې ستونزې سره مخ کېږي.
خپاره شوي مطالب: له کرونا وروسته د ویښتانو تویېدل
ځینو انټرنټي سایټونو داسې مطالب خپاره کړي چې پر کرونا ناروغۍ اخته کسان له رغېدو وروسته د ویښتانو تویېدو له ستونزې سره مخ کېږي.
«هیلیا د پوستکي او ویښتانو کلینیک» د «پر کرونا تر اخته کېدو وروسته د ویښتانو د تویېدو جزئیات + قطعي درملنه (2022)» تر عنوان لاندې یوه مطلب په خپرولو سره لیکلي: «د کرونا ویروس او د ویښتانو تویېدو ترمنځ اړیکه د کرونا ناروغۍ په دوره کې یو له ننګونکو بحثونو څخه دی.»
سرچینه زیاتوي، په منځني ډول ۲۴ سلنه هغه کسان چې له کرونا روغ شوي، د وېښتانو د تویېدو له ستونزې سره مخ شوي دي.
په یاد مطلب کې لیکل شوي، له کرونا وروسته د ويښتانو د تویېدو لامل په څو عواملو پورې تړاو لري او ښایي چې ځیني کسان په يوه وخت کې د څو لاملونو له امله د ويښتانو تويېدو له ستونزې سره مخ شوي وي.
د «LUVE N CARE» په نوم یوه وېبلاګ کې د «له کرونا وروسته د ویښتو تویېدو» تر عنوان لاندې خپاره شوي مطلب کې راغلي، د کووېډ – ۱۹ ویروس یو له خورا عامو عوارضو؛ د ویښتانو تویېدل دي.
په یاد مطلب کې راغلي: «د جلد او ویښتانو متخصصو ډاکټرانو څرګنده کړې چې ډېری هغه ناروغان چې له کووېډ – ۱۹ څخه روغ شوي، د ویښتانو له تویېدو سره مخ کېږي.»
په ورته مهال، د «پورا طب ګستر ایرانیان درمل جوړولو شرکت» هم «له کرونا وروسته د ویښتانو تویېدل» تر سرلیک لاندې خپاره کړي مطلب کې ویلي، هغه کسان چې د کووېډ-۱۹ پر ناروغۍ اخته کېږي، بېلابېلې نښې نښانې لري.
سرچینې لیکلي، د کرونا په ډېری ناروغانو کې د ویښتانو تویېدو په اړه راپورونه ورکړل شوي دي. د امریکا هېواد له ناروغیو د مخنیوي او کنټرول مرکز (CDC) د وېښتانو تویېدل د کووېډ – ۱۹ یو له احتمالي او اوږدمهاله اغېزو بولي چې دا مهال تر څېړنې او مطالعې لاندې دي.
له کرونا رغېدلي کسان د ویښتانو له تویېدو شکایت کوي
د کابل ښار اوسېدونکې مژګان وايي، تېر کال پر کرونا اخته شوې وه او له روغېدو وروسته یې وېښتان تویېږي چې اوس د جلدي ډاکټر تر درملنې لاندې ده.
هغې زیاته کړه: «ما فکر کاوه چې د دغه ویروس په تېرېدو او له دې ناروغۍ په رغېدو سره ښایي د یاد ویروس له امله رامنځته شوې اغېزې به نور زما لپاره ستونزه نه وي، خو له بده مرغه چې د ویښتانو تویېدل راته پیدا شول او اوس هم توییږي.»
د هغې په وينا، د هرې ورځې په تېرېدو سره يې د وېښتانو تويېدل ډېرېدل چې ډېره يې اندېښمنه کړې وه، خو اوس تر درملنې لاندې ده او د وېښتانو تویېدل يې ورو ورو کم شوي دي.
په ورته مهال، نګینه نیازۍ بله مېرمن چې له کووېډ – ۱۹ تر رغېدو وروسته د ویښتانو تویېدو ستونزې سره مخ شوې، وایي: «لومړی چې کله پر کرونا ناروغۍ اخته شوم، سخت سر درد مې درلود؛ څه موده وروسته مې د سر درد ښه شو، خو د وېښتانو تویېدل راته پیدا شول او وېښتان مې ډېر تویېدل، تر څو چې ډاکتر ته نه وم ورغلې، فکر مې کاوه د شامپو تاثیر دی، خو کله مې چې ډاکتر ته مراجعه وکړه، ویې ویل چې د ویښتانو تویېدل دې د کرونا ناروغۍ له امله دي.»
نوموړې وايي، له ډېرې درملنې وروسته يې د وېښتانو تویېدل کم شوي دي.
خو ایا کرونا د ویښتانو د تویېدو اصلي لامل کېدای شي؟
د طب برخې پوهان، له کووېډ-۱۹ ویروس تر رغېدو وروسته د وېښتانو تویېدل تایید کړي، خو وايي چې په دې اړه تر اوسه څېړنې بشپړې شوې نه دي.
په کابل ښار کې د انتاني روغتون متخصص او ټرېنر ډاکټر فریدالله عمري له پژواک سره خبرو کې وویل، کرونا قوي میکروب دی چې پر روحي او رواني فشار سربېره د بدن دفاعي سيستم هم کمزوری کوي.
نوموړی زیاتوي، له دې ناروغۍ تر رغېدو وروسته د بدن د دفاعي سیستم کمزوري کېدل او ذهني او رواني فشارونه د یو شمېر روغتیايي ستونزو رامنځته کېدو لامل ګرځي و د وېښتانو تویېدل له کرونا تر رغېدو وروسته یو له پاتې کېدونکو نښو څخه شمېرل کېږي.
خو نوموړي په داسې حال کې چې ویل یې، تر اوسه په دې برخه کې کومه علمي څېړنه نه ده شوې، زیاته کړه: «د وېښتانو تویېدل په مستقیم ډول له کرونا سره تړاو نه لري، بلکې دا د ویټامینونو او پروټینونو د کمښت، اسټرس، ذهني او رواني فشار او د کرونا پر مهال د مختلفو درملو خوړلو له امله رامنځته کېږي.»
خو ډاکټر عمري وايي، د وېښتانو تویېدل دایمي نه دي او له درېیو تر څلورو میاشتو وروسته د وېښتانو وده بېرته خپل عادي حالت ته ګرځي.
په ورته وخت کې، د جلدي ناروغیو متخصص ډاکتر خالد بهرامي هم وايي: «دا سمه ده چې تر کرونا وروسته ځیني کسان د وېښتانو له تویېدو سره مخ کېږي. هغه معلومات چې موږ تر لاسه کړي، د ویښتانو قسمي تویېدل دي چې ویښتان له رېښو څخه تویږي؛ کرونا ویروس د بدن معافیت سیسټم خورا کمزوری کوي.»
بهرامي زياته کړه: «په ناروغانو کې د ويښتانو تويېدل د هغوى د بدن د کمزوري معافيت له امله رامنځته کېږي چې په سر کې یې وينې جريان کمزوری کړی او ويښتان کمزوري کېدو لامل شوی چې په نتیجه کې دغه ناروغان د ويښتانو له تویېدو سره مخ کېږي.»
نوموړي دا هم وويل چې د ويښتانو تويېدل دايمي نه دي او دغه ستونزه د هغو کسانو لپاره تر ډېره دوام کوي چې پر ارثي ناروغۍ اخته وي.
هغه زیاته کړه، دا نښې په لویانو او د بدن په کمزوري معافیت لرونکو کسانو کې تر شاوخوا شپږو میاشتو او د لوړ معافیت لرونکو کسانو لپاره له درېیو تر څلورو میاشتو پورې دوام کوي.
نوموړي له خلکو وغوښتل چې پر دې ناروغۍ د اخته کېدو پر مهال دې روغتيايي لارښوونې په پام کې ونیسي او د بدن دفاعي سيستم دې پیاوړي کړي، څو د وېښتانو د تويېدو په ګډون د کرونا له وروسته پاتې افتونو خوندي پاتي پاتې شي.
Views: 118
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن