<p style="text-align: justify;">جلالاباد (پژواک، ۲۸ وږی ۱۴۰۱): د ننګرهار د کانونو او پټروليم رياست چارواکي وايي، په دغه ولايت کې د کانونو د غير قانوني کېندنو او قاچاق د مخنيوي لپاره ځانګړې امنيتي قطعه جوړېږي.</p>
<p style="text-align: justify;">د چارواکو په وينا، د ننګرهار په اچين، ګوشتې، کامې، شېرزادو او يو شمېر نورو ولسواليو کې د نفرايټو او ځينو نورو قیمتي او نيمه قيمتي ډبرو د کانونو د غير قانوني کېندنې او قاچاق اندېښنو اړ کړي چې دغه امنيتي قطعه رامنځته کړي.</p>
<p style="text-align: justify;">د ننګرهار ولايت د کانونو او پټروليم رييس مفتي عبدالحميد اخوندزاده د وږي په ۲۸مه پژواک اژانس ته وويل، د رياست الوزراء له لوري د کانونو د غير قانوني کېندنو او قاچاق د مخنيوي لپاره د ۷۰ کسيزې امنيتي قطعې منظوري راغلې چې ډېر ژر به فعاله شي.</p>
<p style="text-align: justify;">دی وايي، په پلان کې ده چې دغه قطعه ډېر ژر په يو شمېر ولسواليو کې فعاله شي او بيا به يې ډېر ژر د ساتونکو شمېر ۲۰۰ کسانو ته لوړ شي.</p>
<p style="text-align: justify;">هغه زياته کړه: «اوس د کامې، ګوشتې، اچين، سپين غر، شېرزادو ولسواليو کې د قيمتي او نيمه قيمتي ډبرو د قاچاق او يا هم د غلا وېره شته، نو هغو ولسواليو کې به دغه قطعه ځای پرځای کېږي چې د کانونو حفاظت وکړي.»</p>
<p style="text-align: justify;">نوموړی که څه هم ډاډ ورکوي چې د پخوا په پرتله د کانونو د خپلسرې کېندنې، قاچاق او غلا پېښې ډېرې کمې شوې خو وايي، لا هم په ځينو ځايونو کې پېښې او اندېښنې شته دي.</p>
<p style="text-align: justify;">د هغه د معلوماتو له مخې، اوس هم هره ورځ د ولسواليو امنيه قوماندانۍ او د استخباراتو مديريتونه له کانونو څارنه کوي او په مشکوکو ځايونو چاپې هم وهي چې د ناقانونه کړنو مخنيوی وکړي.</p>
<p style="text-align: justify;">نوموړی وايي، د ننګرهار په ګوشتې، اچين، هسکې مېنې، نازيانو، دوربابا او شېرزادو ولسواليو کې تر ډېره د مرمر، شوکاڼو، نفرايټ، سلپيتين او فلورايټ کانونه شته چې تر ډېره په ناامنو سيمو کې دي.</p>
<p style="text-align: justify;">په ورته وخت کې، د ننګرهار ولايت اوسېدونکي د دغې امنيتي قطعې جوړېدو ته خوښ دي او غوښتنه کوي چې بايد ژر تر ژره دې خپل فعاليتتونه پيل کړي.</p>
<p style="text-align: justify;">د شېرزادو ولسوالۍ يو اوسېدونکی احمدالله وايي، دغې ولسوالۍ کې د شوکاڼي پراخ کانونه موجود دي او دا ډول امنيتي قطعه کولای شي چې د شوکاڼي د قاچاق او خپلسرې کېندنې مخه ونيسي.</p>
<p style="text-align: justify;">دغهراز د ننګرهار د ګوشتې ولسوالۍ اړوند د سربند سيمې يوه اوسېدونکي الله داد مومند پژواک ته وويل، په تېرو شلو کلونو کې د دغې ولسوالۍ د نفرايټو له کانونو خپلسرې کېندنې شوې چې جدي پاملرنې ته يې اړتيا ده.</p>
<p style="text-align: justify;">هغه وايي، که څه هم اوس دغه کانونه په قرارداد ورکړل شوي، خو ځينو برخو کې يې خپلسرې کېندنې په پټ ډول لا هم کېږي چې د مخنيوي لپاره يې د امنيتي قطعې فعاليت ډېر ګټور تمامېدلی شي.</p>
<p style="text-align: justify;">د چارو کارپوهان په دې باور دي چې که د کانونو سمه ساتنه وشي، په قانوني توګه يې قراردادونه وشي نو له يوې خوا به د هېواد عوايد زيات شي او له بل پلوه به ورسره د بېروزګارۍ کچه هم ټيټه شي.</p>
