کابل (پژواک، ۶ تله ۱۴۰۱): د اطلاعاتو او فرهنګ وزارت د افغان فلم ریاست، نن د بګرام زندان مستند فلم نندارې ته وړاندې کړ چې ډېره برخه یې د امریکایانو له خوا پر زندانیانو د ظلمونو په اړه ده.
د کابل په شمال کې د بګرام هوایي هډه، له ۲۰۰۱ میلادي کال وروسته افغانستان کې د امریکایي ځواکونو تر ټولو ستر پوځي مرکز و؛ خو څه باندې یو کال وړاندې له افغانستانه د دغو ځواکونو له وتلو وروسته، د دغه هوایي ډګر واک د افغانستان له دفاع وزارت سره دی.
د راپورونو له مخې، امریکایانو په افغانستان کې د خپل شتون پرمهال زرګونه افغانان د بګرام په زندان کې بندیان کړي وو.
د بګرام زندان په اړه د مستند فلم جوړونکي محمدظریف درویش کابل کې نندارې ته د یاد فلم د وړاندې کولو په غونډه کې وویل، دغه فلم په شاوخوا اتو میاشتو کې جوړ شوی او ډېره برخه یې د امریکایانو له لورې پر زندانیانو د تر سره شویو ظلمونو ښکارندویه ده.
هغه وایي، فکر یې کاوه چې د نوي سرپرست حکومت په راتګ سره به هېواد کې د فلم جوړولو فرهنګ له منځه ولاړ شي، خو بر عکس اوس د فلمونو جوړولو چارې لا غښتلې شوې او حکومت یې هم سخت ملاتړ کوي.
په دغه مستند کې د بګرام زندان لوړ- لوړ دېوالونه او تنګې خونې تر سترګو کېږي. په فلم کې هغه کسان چې په بګرام زندان کې یې د بند شپې ورځې تېرې کړې، د هغوی د نیول کېدو د څرنګوالي او په زندان کې له هغوی سره د بد چلند، وهلو ټکولو، د لمانځه پرمهال پرې د اوبو او برېښنا پرې کولو، په ژمي کې سړو خونو کې د هغوی د ساتلو او نورو ظلمونو یادونه کوي.
د افغان فلم رئیس شفیعالله جاوید افغان، نندارې ته د دغه مستند د وړاندې کولو په اړه جوړه شوې غونډه کې وویل چې امریکایانو په افغانستان کې ډېر ظلم کړی، خلک یې ځورولي، زنداني کړي او باید د هغوی دغه ظلمونه مستند او خلکو ته وړاندې شي.
دی وایي، د افغانستان په هره سیمه کې د امریکایانو له لوري رامنځته شوې ویجاړۍ تر سترګو کېږي.
د جاوید په وینا، که چېرې د امریکانو د ظلمونو په اړه مستند فلمونه جوړ او تر خلکو ورسول شي، نو راتلونکی نسل به په دې وپوهېږي چې «بهرنیان موږ ته افغانستان هېڅکله نه جوړوي.»
د اطلاعاتو او فرهنګ وزارت مرستیال مولوي عتیقالله عزیزي په دغه غونډه کې وویل چې یاد مستند فلم د امریکایانو د ظلمونو یوه بېلګه ده.
ده وویل، امریکایانو ډېر بېګناه افغانان کلونه کلونه په زندانونو کې اچولي وو.
عزیزي وایي، دغه ډول مستند جوړول چې د افغانانو شجاعت په کې څرګندېږي، د تاریخ لپاره سند پاتې کېږي.
ده دا هم وویل چې ټولې رسنۍ دې د دغه ډول جوړو شویو مستندو فلمونو په خپرولو کې خپل رسالت تر سره کړي او تر خلکو یې ورسوي.
دا په داسې حال کې ده چې د راپورونو له مخې، په افغانستان کې د امریکایي ځواکونو د شتون پرمهال هم د بشري حقونو ځینو سازمانونو بګرام کې د زندانیانو د وضعیت په اړه اندېښنه څرګنده کړې وه او داسې راپورونه خپاره شوي و چې په بګرام کې زندانیان شکنجه کېږي او ډېر یې نه پوهېږي چې په کوم جرم نیول شوي دي.
Visits: 78
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن