مزارشریف (پژواک، ۲۶ تله ۱۴۰۱): د بلخ اوسېدونکي وايي، د نورو ولايتونو په پرتله په دغه ولايت کې د نفتي توکو بيه لوړه ده چې بايد کنټرول شي؛ خو اړوند مسوولين بيا وايي چې په بلخ کې د نفتي توکو کيفيت ښه دى نو ځکه بيه یې هم لوړه ده.
د بلخ یو شمېر اوسېدونکي وایي چې په ټول هېواد کې د نفتي توکو بیې راټیټې شوې، خو دوى اوس هم تېل په هماغه پخوانۍ بیه پېري.
د بلخ د مرکز مزارشريف ښار يوه ټکسي چلوونکي عبدالواحد پژواک ته وويل چې په ټول هېواد کې د نفتي موادو بیې راټیټې شوې، خو دلته اوس هم د يوه لېټر پټرول بيه ٨٦ افغانۍ ده.
هغه زیاتوي چې حکومت د تېلو پر بیې کنټرول نه لري او د تېلو ټانکونه په خپله خوښه په لوړه بیه تېل پلوري.
دغهراز د بلخ يوه بل اوسېدونکي عبدالقاهر چې د بلخ-جوزجان پر لار موټر چلوي پژواک ته وويل، په نورو ولايتونو کې د پټرولو بيه له ٨٠ افغانيو او ډيزلو بيه له سلو افغانيو کښته ده، خو په بلخ کې بيا نرخونه ډېر لوړ دي.
هغه وایي، حکومت باید د تېلو پر بیې کنټرول ولري او له مسوولینو یې وغوښتل چې بیه یې راکمه کړي.
خو بل لورته په بلخ کې د یوه خصوصي تېلو پلورنځي مسوول حامد پژواک ته وويل، د نورو ولايتونو په پرتله دغه ولایت کې د تېلو بيه ځکه لوړه ده چې دلته يوازې روسي او ترکمنستاني تېل پلورل کېږي او کيفيت يې ډېر ښه دى.
هغه وايي: «په نورو ولايتونو کې ايراني تېل دي چې په قاچاقي لارو راوړل کېږي او چندان کيفيت هم نه لري.»
په بلخ کې د تېل پلورونکو اتحادیې مشر عبدالطیف فقیري هم د خلکو دغه ستونزه مني، خو وایي چې د دغه ولایت په مرکز مزارشریف ښار کې شاوخوا ۱۴۰ د تېلو ټانکونه فعالیت لري او ټول د اتحادیې د ټاکل شوي ورځني قیمت له مخې تېل پلوري.
دى هم وايي چې په دغه ولايت کې د تېلو کيفيت ښه دى، نو ځکه يې بېه لوړه ده.
هغه زياتوي چې هیڅوک حق نه لري له ټاکل شوي نرخ پورته تېل وپلوري.
بلخوا د بلخ حکومتي مسوولین بیا وایي چې دوی د تېلو د بیو ټاکلو مسوولیت د بلخ تېل پلورونکو اتحادیې ته ورسپارلی دى.
د بلخ د نفتي موادو ریاست د فني چارو مسوول محمد یاسین حمیدي پژواک ته وويل چې په دغه ولايت کې نفتي توکي د تېل پلورونکو اتحاديې له خوا د ټاکل شوي نرخ له مخې پلورل کېږي.
هغه زیاتوي چې دوی یوازې تېل د کمیت او کیفیت له اړخه ارزوي او څاري یې او د بیې د ټاکلو مسوولیت یې نه لري.
د يادونې ده، په دې وروستيو کې د پلازمېنې کابل په ګډون ډېرو ولايتونو کې د تېلو بيې د مخکې په پرتله په هر لېټر کې تر ٧ افغانيو را ټيټې شوې دي.
Visits: 35
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن