کابل (پژواک، ۹ لېندۍ ۱۴۰۱): د افغانستان د بیارغونې لپاره د امریکا د څار ځانګړې ادارې (سیګار) په یوه راپور کې ویلي، امریکا د تېر نظام له پرځېدو وروسته له افغانستان سره ۱.۱ میلیارد ډالر نغدي مرسته کړې ده.
سیګار په خپله ټویټرپاڼه کې لیکلې چې امریکا اوس هم د افغانستان ترټولو ستر مرستندویه هېواد دی.
د یاد بنسټ په وینا، له افغانستان سره د امریکا په دغه ۱.۱ میلیارد ډالر مرسته کې شاوخوا ۸۱۲ میلیون ډالر چې د امریکا پراختیايي ادارې (یو. اېس، ای. ډي) له لوري او ۳۲۰ میلیون ډالر نور د دغه هېواد د بهرنیو چارو وزارت له لوري شوي، شامله ده.
د سرچینې له قوله، دغه مرستې د ۲۰۲۱ کال د اګست له ۱۵مې وروسته ترسره شوې دي.
د سیګار د راپور له مخې، د دغو مرستو له برخې ۳۲۶ میلیون ډالر به یې د راتلونکي کال په سپټمبر میاشت کې ترسره شي.
د پژواک د یوه راپور پر اساس، په نږدې ۱۲ میاشتو کې د مرستو ۴۷ کڅوړې چې تر یو نیم میلیارد ډېر ډالر کېږي، افغانستان ته راغلې دي.
GET IN TOUCH
NEWSLETTER
SUGGEST A STORY
PAJHWOK MOBILE APP